पाकिस्तानची ढासळती आर्थिक स्थिती, वाढता महसूल आणि वाढती महागाई लक्षात घेऊन गरिबांना मदत करण्यासाठी देशातील बड्या उद्योगांवर 10 टक्के सुपर टॅक्स लावण्याची घोषणा करण्यात आली आहे. पाकिस्तानचे पंतप्रधान शाहबाज शरीफ यांनी देशाला संबोधित करताना ही घोषणा केली आहे. पाकिस्तान सरकारच्या या निर्णयानंतर तेथील शेअर बाजार कोसळला. (Pakistan Imposes Super Tax)

पंतप्रधान शरीफ यांनी जाहीर केले की, महसूल वाढवण्यासाठी आणि महागाईचा भडका लक्षात घेऊन गरिबांना मदत करण्यासाठी देशातील मोठ्या उद्योगांवर 10 टक्के सुपर टॅक्स लावण्याचा निर्णय घेण्यात आला आहे. सिमेंट, स्टील, साखर मोठ्या उद्योगांसह, तेल आणि वायू, खत, एलएनजी टर्मिनल, कापड, बँकिंग, ऑटोमोबाईल आणि सिगारेटशी संबंधित उद्योगांवर हा 10 टक्के सुपर टॅक्स लावण्याचा निर्णय घेण्यात आला आहे. देशाला संबोधित करताना शाहबाज शरीफ म्हणाले की, देशाला गंभीर संकटातून वाचवण्यासाठी आणि सोडवण्यासाठी आघाडी सरकारला हा धाडसी निर्णय घ्यावा लागला.

पाकिस्तानच्या पंतप्रधानांच्या या घोषणेनंतर तेथील शेअर बाजारात मोठी घसरण झाली. बाजार काही मिनिटांत 2,000 अंकांनी घसरला. पाकिस्तान सरकारने आतापर्यंत इंधनाच्या किमतीत वाढ, विजेच्या किमती ते कर, तसेच सरकारी खर्चात कपात करण्याचा निर्णय घेतला आहे. खरं तर, पाकिस्तानमधील महागाई मे महिन्यात दोन वर्षांच्या सर्वोच्च पातळीवर पोहोचली आहे, त्यानंतर चलनाचे मूल्य 17 टक्क्यांनी घसरले आहे. पाकिस्तानचे परकीय चलन 10 अब्ज डॉलरच्या खाली आले आहे. त्यामुळे केवळ दोन महिन्यांची आयात पूर्ण होऊ शकते. तर पाकिस्तानला एका वर्षाची आयात आणि थकित कर्ज फेडण्यासाठी वार्षिक 41 अब्ज डॉलर्सची गरज आहे.