Pakistan Economic Crisis: पाकिस्तान सध्या विविध आर्थिक संकटाचा सामना करत आहे. लॅमिनेशन पेपरच्या तुटवड्यामुळे पाकिस्तानी नागरिकांना पासपोर्ट मिळण्यात अडचणी येत आहेत. यामुळे नागरिकांमधून संताप व्यक्त होताना दिसत आहे.

दरम्यान, पासपोर्टमध्ये वापरण्यात येणारे लॅमिनेशन पेपर पाकिस्तान फ्रान्समधून आयात करतो.

पाकिस्तान सरकार लॅमिनेशन पेपरच्या तुटवड्यावर तोडगा काढण्यासाठी सर्वतोपरी प्रयत्न करत आहे, अशी माहिती पासपोर्ट महासंचालनालयाशी संबंधित एका व्यक्तीने स्थानिक वृत्तपत्राला माहिती दिली आहे.

लवकरच परिस्थिती नियंत्रणात येईल आणि लोकांना लॅमिनेशन पेपर सहज उपलब्ध करून दिला जाईल, असे आश्वासन त्यांनी दिले आहे.

कराचीचा रहिवासी असलेल्या फैजान यांनी दोन महिन्यांपूर्वी पासपोर्टसाठी अर्ज केला होता. मात्र, अद्याप त्यांना पासपोर्ट मिळालेला नाही. त्यामुळे त्यांना महत्त्वाच्या ठिकाणी जाण्याचा प्रवास रद्द करावा लागला.

दरम्यान, पाकिस्तान मागील काही महिन्यापासून आर्थिक संकटाचा सामना करत आहेत. कर्जाचा बोजा वाढल्याने देशातील जनता महागाईने त्रस्त झाली आहे. पेट्रोल, खाद्य तेल, भाजीपाला यासह विविध धान्य देखील महाग झाले आहेत. यामुळे नागरिकांमध्ये रोष निर्माण झाला आहे.

तसेच, देशातील राजकीय वातावरण देखील अस्थिर आहे. देशाचे माजी पंतप्रधान सध्या एका प्रकरणात तुरुंगात आहेत. तर, माजी पंतप्रधान नवाज शरीफ पुन्हा देशात दाखल झाले आहेत. यामुळे पुढील काळात पाकिस्तानमध्ये अनेक नाट्यमय घडामोडी घडण्याची शक्यता आहे.