Pakistan Bans Holi Celebrations In Universities: पाकिस्तानात अल्पसंख्याकांवर होणारे अत्याचार कोणापासून लपलेले नाहीत. पाकिस्तानात हिंदूंना त्यांचे सण उघडपणे साजरे करण्याचे स्वातंत्र्यही नाही. याचे ताजे उदाहरण म्हणजे पाकिस्तानच्या उच्च शिक्षण आयोगाचा (एचईसी) निर्णय, ज्याअंतर्गत पाकिस्तानातील सर्व विद्यापीठांमध्ये होळीच्या सणावर पूर्णपणे बंदी घालण्यात आली आहे.

दरम्यान, इस्लामाबादच्या (Islamabad) कायद-ए-आझम विद्यापीठात हजारो विद्यार्थ्यांची होळी खेळतानाचा व्हिडिओ अलीकडेच व्हायरल झाला होता. यावरुन संपूर्ण पाकिस्तानात गदारोळ झाला होता.

वास्तविक, रंगांचा हा सुंदर सण साधारणपणे मार्चमध्ये साजरा केला जायचा, मात्र यंदा विद्यापीठ बंद असल्याने तो जूनमध्ये साजरा करण्यात आला. येथे शिकणारे सर्व धर्माचे विद्यार्थी एकत्र येऊन होळी साजरी करताना दिसले.

पाकिस्तानी विद्यार्थ्यांना होळीची क्रेझ

तसेच, या व्हिडिओमध्ये पाकिस्तानातील (Pakistan) एक विद्यापीठ होळीच्या रंगांनी रंगले आहे. इस्लामाबादमधील सरकारी अनुदान असलेल्या कायद-ए-आझम विद्यापीठाच्या विद्यार्थ्यांनी होळीचा सण साजरा केला.

या विद्यापीठात होळीचा सण 12 जून रोजी मोठ्या उत्साहात साजरा करण्यात आला. होळीच्या या उत्सवात विद्यापीठातील विद्यार्थ्यांनी रंगांची उधळण करत एकमेकांसोबत होळी साजरी केली. काहींनी याला पश्तो शैलीतील होळी म्हटले, तर काहींनी त्याचा अर्थ वेगळ्या प्रकारे लावला.

पाकिस्तानात खळबळ

कायदे-ए-आझम विद्यापीठाने आपल्या ट्विटर अकाऊंटवर होळीच्या उत्सवाचे अनेक व्हिडिओ शेअर केले आहेत. या व्हिडिओंना आत्तापर्यंत लाखो व्ह्यूज मिळाले आहेत. लोक त्याला खूप पसंतही करत आहेत.

पण दुसरीकडे, पाकिस्तानातील अनेक कट्टरपंथीही या व्हिडिओवर टीका करत आहेत. एकूणच या व्हिडिओवर संमिश्र प्रतिक्रीया येत आहेत. पाकिस्तानात सरकार कोणत्याही पक्षाचे असो, त्यांना कट्टरवाद्यांच्या दबावापुढे झुकावे लागते. त्यामुळे विद्यापीठांमध्ये होळीच्या सणावर बंदी घालण्यात आली आहे.