Nepal: सिंगापूरनंतर हाँगकाँगनेही एव्हरेस्ट आणि एमडीएच मसाल्यांच्या विक्रीवर बंदी घातली. आता नेपाळच्या खाद्य तंत्रज्ञान आणि गुणवत्ता नियंत्रण विभागाने सांगितले की, या मसाल्यांमध्ये इथिलीन ऑक्साईड असण्याची शक्यता आहे. इथिलीन ऑक्साईडचा वापर कीटकनाशक म्हणून केला जातो. नेपाळनेही मसाल्यांची चाचणी सुरु केली आहे. हे दोन्ही ब्रँड मसाल्यांमध्ये खूप लोकप्रिय आहेत. त्याची जगातील अनेक देशांमध्ये निर्यातही होते.

दरम्यान, ब्रिटननेही मसाल्यांच्या चौकशीचे आदेश दिले आहेत. याशिवाय, रिपोर्टनुसार, या मसाल्यांविरोधात न्यूझीलंड, अमेरिका आणि ऑस्ट्रेलियामध्येही तपास सुरु केला जाऊ शकतो. नेपाळच्या खाद्य आणि तंत्रज्ञान विभागाचे प्रवक्ते मोहन कृष्ण महर्जन म्हणाले की, एव्हरेस्ट आणि एमडीएच मसाल्यांच्या आयातीवर बंदी घालण्यात आली आहे. याशिवाय, बाजारात विक्रीवरही बंदी घालण्यात आली आहे. मसाल्यांमध्ये धोकादायक केमिकल असल्याचा संशय आल्यानंतर ही कारवाई करण्यात आली आहे. मात्र, याबाबतचा अंतिम अहवाल अद्याप आलेला नाही. तपास सुरु आहे.

इथिलीन ऑक्साईड हे कार्सिनोजेनिक केमिकल असल्याचे तज्ज्ञांचे म्हणणे आहे. या मसाल्यांचा न्यूझीलंडच्या बाजारातही मोठा दबदबा आहे. नुकतेच हाँगकाँग आणि सिंगापूरच्या खाद्य संस्थांनी एव्हरेस्टच्या फिश करीवर बंदी घातली. तथापि, एजन्सीने असेही म्हटले आहे की, ‘’कमी प्रमाणात या मसाल्यांचे सेवन केल्यास कोणताही धोका नाही. परंतु दीर्घकाळ सेवन करत राहिल्यास कर्करोगाचा धोका उद्भवू शकतो.’’

दरम्यान, हा रंगहीन गॅस असून त्याला गंध आहे. हे अँटी फ्रीझ केमिकल बनवण्यासाठी वापरले जाते. त्याचबरोबर याचा वापर डिटर्जंट, फोम, औषधे आणि कापड उद्योगातही केला जातो. याशिवाय, रुग्णालयांमध्ये स्वच्छता उपकरणांसाठीही याचा वापर केला जातो. त्याला ग्रुप 1 कार्सिनोजेन श्रेणीमध्ये ठेवण्यात आले आहे. याचा अर्थ हे केमिकल कार्सिनोजेनिक असल्याचा पुरेसा पुरावा आहे.