Kapil Dev Sunil Gavaskar Imran Khan support: पाकिस्तानला 1992 मध्ये विश्वविजेता बनवणारे माजी कर्णधार आणि माजी पंतप्रधान इम्रान खान सध्या रावळपिंडीच्या अदियाला तुरुंगात कैद आहेत. 2013 पासून ते तुरुंगात असून त्यांच्यावर भ्रष्टाचाराचे अनेक आरोप लावण्यात आले आहेत. मात्र, गेल्या काही दिवसांपासून इम्रान खान यांची प्रकृती वेगाने खालावत असल्याच्या बातम्या समोर येत आहेत.

याच पार्श्वभूमीवर जागतिक क्रिकेटमधील 14 दिग्गज माजी कर्णधारांनी एकत्र येत इम्रान खान यांच्या मदतीसाठी पाकिस्तान (Pakistan) सरकारला एक पत्र लिहिले आहे. विशेष म्हणजे, या मोहिमेत भारताचे दिग्गज क्रिकेटपटू कपिल देव आणि सुनील गावस्कर यांचाही समावेश असल्याने या विषयाला आंतरराष्ट्रीय स्तरावर मोठे महत्त्व प्राप्त झाले आहे.

या सर्व माजी कर्णधारांनी पाकिस्तान सरकारला एक अधिकृत ईमेल पाठवला असून, त्यात इम्रान खान यांच्या तुरुंगातील स्थितीबद्दल तीव्र चिंता व्यक्त केली आहे. इम्रान खान हे केवळ पाकिस्तानचेच नव्हे, तर जागतिक क्रिकेटमधील एक महान खेळाडू आहेत, याची आठवण या दिग्गजांनी सरकारला करुन दिली आहे.

त्यांनी पत्रात नमूद केले की, इम्रान खान यांनी आपल्या नेतृत्वाखाली पाकिस्तानला विश्वचषक जिंकून दिला आणि क्रिकेटच्या विकासात त्यांचे योगदान अतुलनीय आहे. अशा व्यक्तिमत्त्वाला तुरुंगात ज्या प्रकारे वागणूक मिळत आहे आणि त्यामुळे त्यांच्या आरोग्यावर जो परिणाम होत आहे, तो अत्यंत खेदजनक आहे. सुमारे 1000 दिवसांपासून तुरुंगात असलेल्या इम्रान यांच्यासाठी या खेळाडूंनी प्रामुख्याने मानवी हक्कांची मागणी केली आहे.

सुनील गावस्कर आणि कपिल देव यांच्यासह स्टीव्ह वॉ, क्लाइव्ह लॉयड, अ‍ॅलन बॉर्डर आणि नासिर हुसेन यांसारख्या 14 दिग्गजांनी पाकिस्तान सरकारसमोर तीन प्रमुख मागण्या ठेवल्या आहेत. पहिली मागणी म्हणजे, इम्रान खान यांना तात्काळ दर्जेदार वैद्यकीय उपचार मिळावेत आणि त्यांना तज्ज्ञ डॉक्टरांकडून तपासणी करुन घेण्याची मुभा देण्यात यावी.

दुसरी मागणी म्हणजे, त्यांना आंतरराष्ट्रीय मानकांनुसार सन्मानजनक वागणूक मिळावी आणि त्यांच्या कुटुंबियांना व मित्रांना त्यांना भेटू दिले जावे. तिसरी आणि महत्त्वाची मागणी म्हणजे, इम्रान खान यांना कायदेशीर लढाई पारदर्शक आणि निष्पक्ष पद्धतीने लढण्याची पूर्ण संधी दिली जावी. क्रिकेटच्या मैदानावर एकमेकांचे कट्टर प्रतिस्पर्धी राहिलेले हे खेळाडू आता आपल्या जुन्या सहकाऱ्याच्या जीवनासाठी एकत्र आल्याचे पाहून क्रीडाविश्व भारावून गेले आहे.