Imran khan: इम्रान खानचे पाय आणखी खोलात; पत्नी बुशरा बीबीसह 17 वर्षांच्या तुरुंगवासाची शिक्षा, भ्रष्टाचारप्रकरणी न्यायालयाचा मोठा निर्णय

पाकिस्तानचे माजी पंतप्रधान आणि पाकिस्तान तहरिक-ए-इन्साफ (PTI) चे संस्थापक इम्रान खान यांच्या अडचणीत पुन्हा एकदा मोठी वाढ झाली आहे. भ्रष्टाचाराच्या गंभीर आरोपांखाली पाकिस्तानच्या विशेष न्यायालयाने इम्रान खान आणि त्यांच्या पत्नी बुशरा बीबी या दोघांनाही प्रत्येकी १७-१७ वर्षांच्या कारावासाची कठोर शिक्षा सुनावली आहे.

तोशाखाना-२ प्रकरणात मोठा दणका

शनिवारी रावळपिंडी येथील अडियाला जेलमध्ये झालेल्या सुनावणीदरम्यान विशेष न्यायाधीश शाहरुख अर्जुमंद यांनी हा ऐतिहासिक निकाल दिला. 'डॉन' या पाकिस्तानी वृत्तपत्राने दिलेल्या माहितीनुसार, फेडरल इन्व्हेस्टिगेशन एजन्सीच्या (FIA) विशेष न्यायालयाने इम्रान खान आणि बुशरा बीबी यांना 'तोशाखाना-२' प्रकरणात दोषी ठरवले आहे.

हा खटला मे २०२१ मध्ये सौदी अरेबियाच्या क्राउन प्रिन्सने दिलेल्या महागड्या 'बुल्गारी' दागिन्यांच्या सेटशी संबंधित आहे. हे दागिने अधिकृत सरकारी भेटीत मिळाले होते, परंतु ते अत्यंत कमी किमतीत खरेदी केल्याचा ठपका या दांपत्यावर ठेवण्यात आला आहे.

न्यायालयाने केवळ तुरुंगवासाची शिक्षाच दिली नाही, तर दोघांवर मिळून १६.४ दशलक्ष पाकिस्तानी रुपयांचा मोठा दंडही ठोठावला आहे. भ्रष्टाचाराच्या आरोपाखाली इम्रान खान यांना १० लाख रुपये आणि बुशरा बीबी यांना ५ लाख रुपयांचा स्वतंत्र दंड भरावा लागणार आहे. हा दंड न भरल्यास त्यांना अतिरिक्त काळ तुरुंगात राहावे लागेल.

यासोबतच न्यायालयाने त्यांची जमीन जप्त करण्याचे आदेशही दिले आहेत. भ्रष्टाचार प्रतिबंधक कायद्याच्या कलम ४०९ (फौजदारी विश्वासघात) आणि कलम ५(२)४७ (लोकसेवकांकडून गुन्हेगारी गैरवर्तन) अंतर्गत त्यांना ही कठोर शिक्षा सुनावण्यात आली आहे.

इम्रान खान आधीच तुरुंगात असून त्यांच्या कुटुंबीयांना त्यांना भेटण्यावरही प्रशासनाने बंदी घातली होती. आता पत्नीसह १७ वर्षांच्या शिक्षेमुळे त्यांच्या राजकीय भविष्यावर मोठे प्रश्नचिन्ह निर्माण झाले आहे.

अल-कादिर ट्रस्ट आणि १९० दशलक्ष पाउंडच्या फसवणुकीशी संबंधित या प्रकरणाने पाकिस्तानच्या राजकारणात पुन्हा एकदा अस्थिरतेचे वातावरण निर्माण केले आहे. या निकालामुळे पीटीआय समर्थकांमध्ये संतापाची लाट असून आगामी काळात पाकिस्तानमध्ये मोठ्या राजकीय घडामोडी घडण्याची शक्यता आहे.