इटलीजवळ समुद्रात बोट बुडाली असून, इटालियन कोस्ट गार्ड आणि अग्निशमन दलाच्या जवानांनी 30 हून अधिक स्थलांतरितांचे मृतदेह बाहेर काढले आहेत. याला दुजोरा देताना अधिकाऱ्यांनी सांगितले की, देशाच्या दक्षिणेकडील किनारपट्टीजवळ हा अपघात झाला असून आतापर्यंत 58 जणांना वाचवण्यात यश आले आहे.

राज्य टीव्हीने स्थानिक प्रशासन प्रमुखांच्या कार्यालयाच्या हवाल्याने दिलेल्या माहितीनुसार, सकाळपर्यंत 33 मृतदेह बाहेर काढण्यात आले असून, 58 जणांना वाचवण्यात यश आले आहे. दरम्यान, मृतांमध्ये 24 पाकिस्तानी लोकांचा देखील समावोश असल्याची माहिती समोर आली आहे.

इटलीची वृत्तसंस्था एजीआयने सांगितले की, मृतदेहांमध्ये लहान मुलांचाही समावेश आहे. 100 हून अधिक लोक एका लाकडी बोटीवर होते, जी इटलीच्या कॅलाब्रिया द्वीपकल्पावरील क्रोटोन या किनारी शहराजवळ पहाटे पहाटेच्या सुमारास उलटली, असे राज्य रेडिओ आरआयएने बंदर अधिकाऱ्यांच्या हवाल्याने सांगितले. रेडिओच्या वृत्तानुसार बचावकार्य अजूनही सुरू आहे.

नावेत 180 लोक असावेत असे इटालियन न्यूज एजन्सी लाप्रेसेने सांगितले आहे. 27 जण स्वतः पोहून किनाऱ्यावर पोहोचल्याचे सरकारी टीव्हीवर सांगण्यात आले. मात्र, स्थलांतरितांचे राष्ट्रीयत्व अद्याप निश्चित झालेले नाही. बोट कुठून येत होती हे देखील स्पष्ट नव्हते, परंतु स्थलांतरित नौका अनेकदा तुर्की किंवा इजिप्तच्या किनारपट्टी वरून निघतात. अशी माहिती समोर आली आहे.

बचाव कार्यात सहभागी अग्निशमन दलाचे प्रवक्ते लुका कारी यांनी सांगितले की, सुमारे 40 प्रवासी जिवंत सापडले आहेत. रेडिओच्या वृत्तानुसार बचावकार्य अजूनही सुरू आहे. किनार्‍याजवळ नावेचे तुकडे विखुरलेले आहेत. इटालियन न्यूज एजन्सी एजीआयने दिलेल्या माहितीनुसार, मृतांमध्ये बाळाचाही समावेश आहे, ज्याचा मृतदेह बाहेर काढण्यात आला आहे.

इंटरनॅशनल ऑर्गनायझेशन फॉर मायग्रेशनच्या मिसिंग मायग्रंट्स प्रोजेक्टनुसार, 2014 पासून मध्य भूमध्य समुद्रात 20,333 लोक मरण पावले आहेत किंवा बेपत्ता झाले आहेत.