Iran US Diplomatic Talks 7 Conditions Donald Trump: मध्य पूर्वेतील प्रचंड वाढत्या तणावाच्या पार्श्वभूमीवर इराणने अमेरिकेसोबतचे युद्ध संपवण्यासाठी चर्चेचे पाऊल उचलले आहे. इराण अमेरिकेसोबत राजनैतिक टेबलवर चर्चा करण्यास तयार झाला असला, तरी त्यांनी अमेरिकन राष्ट्राध्यक्ष डोनाल्ड ट्रम्प यांच्यासमोर तब्बल 7 कडक अटी ठेवल्या आहेत. कतार आणि पाकिस्तानच्या माध्यमातून इराणने आपला हा संदेश आणि अटी थेट व्हाईट हाऊसपर्यंत पोहोचवल्या आहेत.

इराणच्या (Iran) सुप्रीम नॅशनल सिक्युरिटी कौन्सिलचे सचिव मोहसेन रझाई यांनी एका मुलाखतीत स्पष्ट केले की, ट्रम्प यांनी स्वतः निर्माण केलेल्या या संकटातून जर अमेरिकेला बाहेर पडायचे असेल, तर त्यांना इराणच्या या अटी मान्य कराव्याच लागतील, अन्यथा अमेरिका आणि इराणमध्ये निर्णायक व भीषण युद्ध अटळ आहे.

इराणने ठेवलेल्या प्रमुख अटींमध्ये अमेरिकेने सर्व आघाड्यांवर इराणविरोधी लष्करी कारवाया पूर्णपणे थांबवणे, इराणचे जप्त केलेले अब्जावधी डॉलरचे फंड तात्काळ मुक्त करणे आणि समुद्रातील आर्थिक नाकेबंदी हटवणे या मुद्द्यांचा समावेश आहे. जर अमेरिकेने या अटी स्वीकारल्या तरच इराण करारावर स्वाक्षरी करेल. रझाई यांनी ट्रम्प यांच्या इशाऱ्यांना आणि धमक्यांना निरर्थक ठरवत म्हटले की, धमक्यांनी इराणला झुकवता येणार नाही.

दोन्ही देशांमधील जुन्या सामंजस्य कराराची मुदत संपल्यामुळे ही नवी बोलणी सुरु करण्याचा प्रयत्न केला जात आहे. मात्र, यावेळी अमेरिकेने हे लक्षात ठेवावे की इराणची लष्करी रणनीती आता पूर्णपणे बदलली आहे. इराणने आपल्या लष्करी ताकदीचे प्रदर्शन करत नुकतीच आखाती समुद्रात तैनात असलेल्या अमेरिकन एअरक्राफ्ट कॅरियरजवळ मल्टी-वॉरहेड अँटी-शिप क्षेपणास्त्राची यशस्वी चाचणी घेतली आहे.

इराणचा हा दावा अमेरिकेच्या सुरक्षेसाठी मोठा धक्का मानला जात आहे. प्रत्यक्ष व्यवहारात युद्ध सुरुच आहे, परंतु हा संघर्ष लवकर संपवण्यासाठी इराणने ही कूटनैतिक रणनीती आखली आहे. आता चेंडू पूर्णपणे राष्ट्राध्यक्ष ट्रम्प यांच्या कोर्टात असून, त्यांनी शांततेचा मार्ग निवडायचा की विनाशाचा, याचा निर्णय त्यांनाच घ्यायचा आहे, असे इराणने स्पष्ट केले आहे.