India Maldives Tension:

मालदीवचे राष्ट्राध्यक्ष मोहम्मद मुइज्जू गेल्या वर्षी निवडणुकीत विजयी झाल्यापासून भारत आणि मालदीव यांच्यातील संबंध कमालीचे ताणले गेले आहेत. मुइज्जू यांनी भारतीय लष्कराला मालदीवमधून माघार घेण्याचा अल्टिमेटमही दिला आहे. भारतापासून अंतर राखणारा मालदीव आता हळूहळू चीनच्या जवळ जात आहे. नुकतेच मुइज्जू यांनी चीनला भेट दिली होती, जिथे पर्यटनासह 20 करारांवर स्वाक्षऱ्या करण्यात आल्या होत्या.

दरम्यान, भारतासोबत (India) सुरु असलेल्या तणावाच्या पार्श्वभूमीवर आता मालदीवने मोठा निर्णय घेतला आहे. वास्तविक, मालदीवने 43 भारतीय नागरिकांना आपल्या देशातून बाहेर काढण्याचा निर्णय घेतला आहे. मालदीवने 43 भारतीयांसह 186 परदेशी नागरिकांवर व्हिसाचे उल्लंघन आणि अंमली पदार्थांशी संबंधित गुन्हे केल्याचा आरोप केला आहे. त्यामुळे आता मालदीव या लोकांना हद्दपार करत आहे.

दुसरीकडे, भारतीय नागरिकांना हद्दपार केल्यानंतर भारत आणि मालदीवमधील संबंध आणखी बिघडण्याची भीती आहे. मालेच्या ऑनलाइन न्यूज ऑर्गनायझेशन 'अधाधू'च्या एका बातमीने भारतीयांच्या हद्दपारीची माहिती दिली आहे. वृत्तानुसार, निर्वासित करण्यात आलेल्या लोकांमध्ये सर्वाधिक संख्या बांगलादेशातील आहे. किमान 83 बांगलादेशींना हद्दपार करण्यात आले आहे, त्यानंतर 43 भारतीय, 25 श्रीलंकेचे आणि आठ नेपाळी नागरिक आहेत.

मालदीवचे (Maldives) गृहमंत्री अली इहुसान यांनी पत्रकार परिषदेत सांगितले की, मंत्रालय बेकायदेशीर कारवायांवर कारवाई करण्यासाठी अर्थ मंत्रालयाशी जवळून काम करत आहे. ते पुढे म्हणाले की, गृह मंत्रालय अशा कारवायांना आळा घालण्यासाठी हद्दपार करण्याच्या दिशेने काम करत आहे.

इमिग्रेशन कंट्रोलर शमन वाहिद यांनी सांगितले की, गुन्हे करणाऱ्या 186 परदेशी लोकांना मालदीवमधून हद्दपार करण्यात आले आहे. ते पुढे म्हणाले की, गुन्हेगारी कृत्यांमध्ये सहभागी असलेल्या परदेशी लोकांचा शोध घेण्याच्या कारवाईचा एक भाग म्हणून, इमिग्रेशन विभागाने काही लोकांना ताब्यात घेतले आणि ज्यांच्याकडे वैध कागदपत्रे आणि पासपोर्ट होते त्यांना हद्दपार केले.