Russia-Ukraine War: युक्रेनमधील लोकांना सध्या युद्धासह कडाक्याच्या थंडीलाही तोंड द्यावे लागत आहे. रशिया-युक्रेन युद्धाला या महिन्यात ९ महिने पुर्ण होतील. युद्ध कधी संपणार हे कोणच सांगू शकत नाहीय. त्यातच रशियाने युक्रेनमधील वीज केंद्रांवर केलेल्या हल्ल्यांमुळे येथील जनजीवन विस्कळीत झाले आहे. 1 कोटीहुन अधिक लोकांना अंधारात जीवन व्यतीत करावे लागत असल्याने जवळपास 30 लाख लोकांनी उणे 20 अंश तापमानात घर सोडण्याचा निर्णय घेतला आहे.

जागतिक आरोग्य संघटनेने युक्रेनमधील स्थितीवरून एक चिंता व्यक्त केली आहे. त्यात उर्जा संकटाचा सामना करत असलेल्या युक्रेनमध्ये थंडीमुळे लाखो लोकांचा जीव जाऊ शकतो, असे डब्ल्यू एचओने म्हटले आहे. गेल्या काही दिवसांमध्ये रशियाने युक्रेनमधील वीज केंद्रांना लक्ष्य केले आहे. त्यामुळे येथील घरांमध्ये वीज नाही. याशिवाय वीज संसाधने आणि इतर उर्जा उपकरणांचे मोठे नुकसान युक्रेनमध्ये झाले आहे. या साधनांनी युक्रेनमध्ये कमतरता दिसून येत आहे.

डब्ल्यूएचओचे प्रादेशिक संचासलक हॅन्स हेन्री क्लयूग म्हणाले की, युक्रेनच्या अर्ध्याहून अधिक उर्जा केंद्रांचे नुकसान झाले आहे. तर काही पुर्णतः उद्धवस्त झाले आहेत. त्याचा परिणाम लोकांच्या आरोग्यावर होत आहे. सध्या एक कोटी लोक विजेशिवाय जगत आहेत. तर 30 लाख लोक थंडीपासून बचावासाठी घर सोडण्याच्या तयारीत आहेत. युक्रेनमधील थंडी जीवघेणी ठरू शकते. सध्या येथील तापमान उणे 20 अंश सेल्सियसवर जाण्याची शक्यता आहे.

रशिया-युक्रेनमधील तणाव सध्या सर्वोच्च पातळीवर आहे. लोक वीज नसल्याने वैतागले आहेत. याशिवाय थंडीमुळे अनेक प्रकारच्या संसर्गाचाही धोका आहे. रूग्णालयांच्या कमतरतेमुळे येथे थोडा संसर्गही मोठी उलथापालथ माजवू शकतो. कोरोनामुळे निमोनिया, श्वासोच्छवासाशी निगडीत आजारही गंभीर रूप घेऊ शकतात. रशियाने युक्रेनमधील 100 हून अधिक आरोग्य केंद्रे उद्धवस्त केली आहेत.