Israel-Hamas War: इस्रायल-हमास यांच्यात मागील 20 दिवसांपासून घनघोर युद्ध सुरु आहे. यातच आता, इस्रायली लष्कराने गाझामधील हमासच्या दहशतवाद्यांचे अड्डे उद्ध्वस्त केले.

इस्रायली लष्कराने सोशल मीडियावर एक व्हिडिओ जारी केला, ज्यामध्ये शालदाग युनिटचे सैनिक हमासच्या दहशतवाद्यांवर गोळीबार करताना दिसत आहेत. विशेष म्हणजे, या कारवाईत हमासच्या तावडीतून ओलिसांची सुटकाही केली.

दरम्यान, आयडीएफने जारी केलेल्या व्हिडिओमध्ये इस्रायली लष्कराने दहशतवाद्यांच्या वाहनावर गोळीबार करताना कारवरील नियंत्रण गमावलेल्या ड्रायव्हरला ठार केले. यानंतर, आयडीएफच्या जवानांनी सेलमध्ये उपस्थित असलेल्या इतर दहशतवाद्यांना (Terrorists) ठार केले, जे पळून जाण्याच्या प्रयत्नात होते. आयडीएफच्या विशेष दलाने नंतर किबुत्झ बीरी येथील ओलिसांची सुटका केली.

त्यांच्या ग्राउंड आक्रमणापूर्वी, इस्रायली सैन्याने गुरुवारी रात्री उत्तर गाझा पट्टीमध्ये तासभर हल्ला केला आणि हमासच्या (Hamas) दहशतवाद्यांना ताब्यात घेतले. आयडीएफने गाझामधील जमिनीवरील लढाईपूर्वी अनेक दहशतवादी ठिकाणांवर हल्ले केले.

अल जझीराच्या वृत्तानुसार, इस्रायली लष्कराने 250 दहशतवादी ठिकाणांना लक्ष्य केले. दरम्यान, हमासविरुद्धच्या लष्करी हल्ल्यामुळे पॅलेस्टाईनमध्ये राहणाऱ्या लोकांचे मानवतावादी संकट वाढले आहे.

दुसरीकडे, अनेक दशकांपासून चाललेल्या इस्रायल-पॅलेस्टाईन संघर्षात गाझामधील सध्याची परिस्थिती अभूतपूर्व आहे. इस्रायलने हमासला संपवण्याच्या उद्देशाने जमिनीवरील आक्रमण तीव्र केल्यास गाझामधील मृतांची संख्या आणखी वाढू शकते.

हमास शासित गाझामधील आरोग्य मंत्रालयाने बुधवारी सांगितले की, गेल्या 24 तासांत 750 हून अधिक लोकांचा मृत्यू झाला आहे, एका दिवसापूर्वी ही संख्या 704 पेक्षा जास्त होती.

युनायटेड नेशन्सच्या आकडेवारीनुसार, 2014 च्या युद्धाशी तुलना केल्यास, सहा दिवस चाललेल्या युद्धात 2,251 पॅलेस्टिनी मारले गेले होते.

बुधवारी 'अल-जझीरा'चे वरिष्ठ पत्रकार वेल दहदौह यांची पत्नी, मुलगा, मुलगी आणि नातू गाझामध्ये इस्रायली हल्ल्यात ठार झाले. विशेष म्हणजे, अल-जझीराने एक व्हिडिओ प्रसारित केला, ज्यामध्ये दहदौह आपल्या मृत मुलाला रुग्णालयात पाहताना दिसत होते. गुरुवारी, ते आणि इतर शोककर्ते अंत्यसंस्कारासाठी उपस्थित होते.

इस्रायली लष्कराने केवळ हमासच्या ठिकाणांवर हल्ला केल्याचे सांगितले. तर दुसरीकडे, दाट लोकवस्तीच्या गाझामध्ये निष्पाप नागरिकांवर हल्ला केल्याचा आरोप हमासने इस्रायलवर केला आहे.

युद्ध सुरु झाल्यापासून हमासच्या दहशतवाद्यांनी इस्रायलवर रॉकेट हल्ले केले. प्रत्युत्तरात इस्रायली लष्करानेही हमासच्या ठिकाणांवर क्षेपणास्त्र हल्ला केला, असे लष्कराने सांगितले. मात्र, दोन्ही बाजूंनी अद्याप जीवितहानीबद्दल माहिती दिलेली नाही

दरम्यान, गुरुवारी सकाळी दक्षिणेकडील खान युनिस शहरातील एका निवासी इमारतीवर हवाई हल्ला करण्यात आला. या इमारतीत 25 विस्थापितांसह 75 लोक राहत असल्याचे स्थानिक लोकांनी सांगितले.

गाझाच्या आरोग्य मंत्रालयाने सांगितले की, युद्धात 6,500 हून अधिक पॅलेस्टिनींचा मृत्यू झाला आहे. यामध्ये गेल्या आठवड्यात रुग्णालयात झालेल्या स्फोटात मृत्युमुखी पडलेल्यांचाही समावेश आहे. निवृत्त जनरल आणि इस्रायलच्या मंत्रिमंडळाचे सदस्य बेनी गॅंट्झ म्हणाले की, “मोहीम लवकरच अधिक ताकदीने तीव्र होईल.''