ट्युनिशियाचे माजी पंतप्रधान आणि एन्नाहदा इस्लामी चळवळीचे उपप्रमुख अली लारायेद यांना दहशतवादाशी संबंधित गंभीर आरोपांवरुन तब्बल 34 वर्षांच्या कारावासाची शिक्षा सुनावण्यात आली आहे. या प्रकरणात त्यांच्यासह आणखी आठ जणांनाही शिक्षा ठोठावण्यात आली आहे, अशी माहिती ट्युनिशियाच्या अधिकृत वृत्तसंस्था टीएपीने शनिवारी (3 मे) दिली.

टीएपीच्या वृत्तानुसार, लारायेद आणि त्यांच्या सहकाऱ्यांवर "दहशतवादी संघटना स्थापन करण्यात सहभाग घेणे, देशांतर्गत अशा संघटनांमध्ये सामील होणे आणि ट्युनिशियातील तरुणांना दहशतवादी गटांमध्ये सहभागी होण्यासाठी परदेशात पाठवणे, अशा आरोपांखाली खटला दाखल करण्यात आला होता. हा खटला ट्युनिशियामध्ये "मानवी तस्करी खटला" म्हणून ओळखला गेला.

दरम्यान, या खटल्यातील सर्व आरोपींवर इस्लामिक स्टेट (दाएश/आयएसआयएस) या दहशतवादी (Terrorist) संघटनेशी संबंधित भागात तरुणांची तस्करी केल्याचा ठपका ठेवण्यात आला आहे. त्यामुळे न्यायालयाने 18 ते 36 वर्षांपर्यंतच्या कारावासाची शिक्षा जाहीर केली. या शिक्षेमुळे ट्युनिशियातील राजकीय वातावरण अधिकच तापण्याची शक्यता आहे.