अमेरिकेत गोळीबाराच्या घटना वाढत आहेत. अमेरिकन मीडियानुसार, या आठवड्याच्या शेवटी शिकागोमध्ये गोळीबाराच्या अनेक घटना घडल्या, ज्यामध्ये 8 जणांनी जीव गमावला तर 16 जण जखमी झाले.

गोळीबाराची पहिली घटना शुक्रवारी सायंकाळी 5:45 च्या सुमारास घडली. शिकागोच्या दक्षिण किलपॅट्रिक भागात एका 69 वर्षीय व्यक्तीची त्याच्या घरी गोळ्या झाडून हत्या करण्यात आली. पोलिसांनी दिलेल्या माहितीनुसार, पीडितांमध्ये अल्पवयीन तसेच 62 वर्षीय महिलेसह सर्व वयोगटातील लोकांचा समावेश आहे. ब्राइटन पार्क, साउथ इंडियाना, नॉर्थ केडजी अव्हेन्यू, हम्बोल्ट पार्क यासह अनेक भागात या घटना घडल्याचे अहवालात म्हटले आहे.

अमेरिकन मीडियानुसार, गेल्या आठवड्यात झालेल्या गोळीबारात 8 जणांचा मृत्यू झाला, तर 42 जण जखमी झाले. अमेरिकेत तुरळक गोळीबाराबरोबरच सामूहिक गोळीबार ही देखील मोठी समस्या बनत आहे. गन वायलेन्स आर्काइव्ह या संशोधन गटाच्या आकडेवारीनुसार, 2022 मध्ये अमेरिकेत आतापर्यंत 140 हून अधिक सामूहिक गोळीबाराच्या घटना घडल्या आहेत.