दुबईतील (Dubai) एका न्यायालयाने 40 वर्षीय महिलेला सुमारे 41 हजार रुपयांचा दंड ठोठावला आहे. पतीच्या गोपनीयतेशी छेडछाड केल्याप्रकरणी ही महिला दोषी आढळली आहे. खरं तर, महिलेने तिच्या पतीचा फोन नंबर आणि फोटो इंस्टाग्रामवर शेअर केले होते, त्यानंतर हे प्रकरण कोर्टात गेले. पोलीस तपासामधून समोर आले आहे की, महिलेने जानेवारी महिन्यात तिच्या पतीसोबतच्या शेवटच्या चॅटचे काही फोटो इंस्टाग्रामवर (Instagram) अपलोड केले होते. त्यामुळे पीडित पतीने बुर, दुबई येथील पोलीस ठाण्यात तक्रार दाखल केली आणि तिच्याविरुध्द गुन्हा दाखल केला.

कोर्टात पतीने पत्नीच्या या कृत्यामुळे गोपनीयतेचा भंग झाल्याचा आरोप केला आहे. मात्र, पत्नीने कोर्टासमोर आपल्यावरील आरोप फेटाळून लावले. तर दुसरीकडे पत्नीने आपल्या बचावात सांगितले की,मी त्याच्या फ्लॅटवर होते. दरम्यान त्याच्याच फोनवरुन त्याच्या बहिणीशी बोलत होते. दरम्यान, या महिलेचा तिच्या पतीचे घटस्फोटाचे प्रकरणही सुरु आहे.

तथापि, पत्नीने नंतर न्यायालयासमोर कबूल केले की, मी मुलांचे फोटो आणि पतीसोबतच्या चॅट्स इन्स्टाग्राम प्लॅटफॉर्मवर शेअर केल्या होते. पत्नीने पुढे सांगितले की, असे प्रकरण न्यायालयात पोहोचेल, हे माहित नव्हते. या प्रकरणाच्या तपासानंतर न्यायालयाने पत्नीला 41 हजार रुपये दंड ठोठावण्याचे आदेश दिले. तर दोषी पत्नीवर कठोर कारवाई करण्याची मागणी फिर्यादी पक्षाकडून करण्यात आली.