Trump Truth Social Jerusalem Post screenshot: अमेरिकेचे राष्ट्राध्यक्ष डोनाल्ड ट्रम्प यांनी इराणच्या मुद्द्यावर पुन्हा एकदा अत्यंत धक्कादायक विधान करत जागतिक राजकारणात खळबळ उडवून दिली. ट्रम्प यांनी आपल्या 'ट्रुथ सोशल' अकाउंटवर 'द जेरुसलेम पोस्ट' या प्रसिद्ध वृत्तपत्राच्या रिपोर्टचा स्क्रीनशॉट शेअर केला. या रिपोर्टमध्ये इराणच्या तुरुंगांमध्ये कैद्यांवर, विशेषतः महिला आणि अल्पवयीन मुलींवर मोठ्या प्रमाणावर लैंगिक अत्याचार होत असल्याचा खळबळजनक दावा करण्यात आला.

चौकशीदरम्यान सुरक्षारक्षकांकडून महिलांना त्रास दिला जात असल्याचा आणि त्यांची छळवणूक केली जात असल्याचा उल्लेख यामध्ये आहे. मात्र, इराण (Iran) सरकारने हे सर्व आरोप फेटाळून लावले आहेत.

त्याचबरोबर ट्रम्प यांनी आंतरराष्ट्रीय व्यापाराच्या दृष्टीने अत्यंत महत्त्वाच्या असलेल्या होर्मुझच्या सामुद्रधुनीवर आता अमेरिकेचे पूर्ण नियंत्रण प्रस्थापित झाल्याचा दावा केला. इराणला अमेरिकेसोबत करार करण्याची प्रचंड घाई आहे, मात्र अमेरिकेला इराणच्या अटी अजिबात मान्य नाहीत. इराण गंभीर आर्थिक संकटाचा सामना करत असून त्याच्याकडे आपल्या सैन्य आणि पोलीस दलाला देण्यासाठी पगारही उरलेला नाही. इराणची महागाई 350 टक्क्यांवर पोहोचली असून नौदल आणि हवाई दल पूर्णपणे कोलमडले आहे.

इराणच्या अणू कार्यक्रमावर बोलताना ट्रम्प यांनी कठोर भूमिका स्पष्ट केली. तेहरानला कधीही अण्वस्त्रे बनवण्याची किंवा ती बाळगण्याची परवानगी दिली जाणार नाही, कारण अण्वस्त्रे मिळताच इराण इस्रायल आणि इतर देशांवर हल्ला करु शकतो, असा दावा ट्रम्प यांनी केला. या परिस्थितीवर तोडगा काढण्यासाठी ट्रम्प प्रशासनाने इराणवर कडक आर्थिक निर्बंध लादून आर्थिक दबाव वाढवण्यास सुरुवात केली.