Donald Trump Attack Case Video: अमेरिकेचे राष्ट्राध्यक्ष डोनाल्ड ट्रम्प यांच्यावरील प्राणघातक हल्ल्याच्या प्रकरणात एक अत्यंत धक्कादायक आणि मोठा खुलासा झाला. अमेरिकेच्या न्याय विभागाने या प्रकरणातील मुख्य आरोपी कोल ॲलन याचा एक नवा व्हिडिओ प्रसिद्ध केला असून या व्हिडिओने सुरक्षा यंत्रणांच्या तपासाला नवी दिशा दिली. या फुटेजमध्ये आरोपी कोल ॲलन हॉटेलमध्ये हातात बंदुकीसह वावरताना दिसत आहे. तपासासाठी हा व्हिडिओ एक अत्यंत निर्णायक पुरावा मानला जात असून यामध्ये सुरक्षा यंत्रणांचे अधिकारी आरोपीवर आपली शस्त्रे रोखून उभे असल्याचेही पाहायला मिळते.

या नवीन व्हिडिओवर भाष्य करताना कोलंबियाच्या यूएस अटॉर्नी जीनिन पिरोनी यांनी सांगितले की, फुटेजमध्ये आरोपी व्यक्ती अत्यंत वेगाने सिक्युरिटी चेकपॉईंटच्या दिशेने जाताना दिसते आणि त्यानंतर अचानक तिथे गोळीबाराची घटना घडते. या भीषण हल्ल्यात 'सिक्रेट सर्व्हिस'चा एक अधिकारी जखमी झाला. व्हिडिओच्या सखोल तपासणीनंतर असेही समोर आले की, हा केवळ अचानक घडलेला प्रकार नसून आरोपीने गुन्ह्यापूर्वी हॉटेल परिसराची पूर्णपणे रेकी केली होती. तपास यंत्रणांच्या मते, हा हल्ला पूर्णपणे पूर्वनियोजित होता आणि आरोपी पूर्ण तयारीनिशी घटनास्थळी पोहोचला होता.

गोळीबाराची ही घटना घडल्यानंतर आरोपीला घटनास्थळावरुनच तात्काळ अटक करण्यात आली होती. त्याच्यावर राष्ट्राध्यक्ष डोनाल्ड ट्रम्प यांच्या हत्येचा प्रयत्न केल्यासह अनेक गंभीर कलमांखाली गुन्हे दाखल करण्यात आले. या प्रकरणातील हल्लेखोराचा मूळ हेतू काय होता आणि या कटामध्ये अन्य कोणाचा सहभाग आहे का, याचा शोध अमेरिकन तपास संस्था घेत आहेत. दरम्यान, भरदिवसा आणि कडक सुरक्षेत घडलेल्या या गोळीबारामुळे अमेरिकेतील (America) सुरक्षा व्यवस्था आणि विशेषतः अतिमहत्त्वाच्या व्यक्तींच्या कार्यक्रमांमधील सुरक्षेच्या त्रुटींवर मोठे प्रश्नचिन्ह उपस्थित झाले.