Dhurandhar Style Killing In Pakistan: पाकिस्तान आता दहशतवाद्यांचे सुरक्षित ठिकाण उरले नसल्याची चर्चा पुन्हा एकदा रंगली आहे. दहशतवादी संघटना 'जैश-ए-मोहम्मद'चा मुख्य दहशतवादी आणि 26/11 च्या मुंबई दहशतवादी हल्ल्याचा मुख्य सूत्रधार झकी-उर-रहमान लखवीचा जवळचा नातेवाईक हाफिज जुल्फिकार याची एका अज्ञात बंदूकधाऱ्याने गोळ्या झाडून हत्या केल्याचा दावा सोशल मीडियावर केला जात आहे. या संदर्भातील एक सीसीटीव्ही फुटेज इंटरनेटवर वेगाने व्हायरल होत असून, त्यात एका व्यक्तीवर अगदी जवळून डोक्यात गोळी झाडल्याचे स्पष्ट दिसत आहे.

व्हायरल झालेल्या या सीसीटीव्ही फुटेजमध्ये एक अज्ञात हल्लाखोर पाठीमागून येतो आणि डोक्यात गोळी झाडतो. गोळी लागताच ती व्यक्ती जागीच कोसळते आणि हल्लाखोर तेथून पळ काढतो. हा मृत व्यक्ती दुसरा कोणी नसून हाफिज जुल्फिकारच असल्याचा दावा केला जात आहे. भारताचे माजी लेफ्टनंट जनरल डी.पी. पांडे यांनीही हा व्हिडिओ सोशल मीडियावर शेअर करत "लपण्यासाठी कोणतीही जागा उरलेली नाही" अशी मार्मिक प्रतिक्रिया दिली. मात्र, या व्हायरल व्हिडिओची आणि हत्येच्या दाव्याची कोणतीही अधिकृत किंवा स्वतंत्र पुष्टी झालेली नाही.

झकी-उर-रहमान लखवी हा लष्कर-ए-तय्यबाचा लष्करी कमांडर असून 26/11च्या मुंबई हल्ल्याचा मुख्य सूत्रधार आहे, ज्याला संयुक्त राष्ट्रानेही आंतरराष्ट्रीय दहशतवादी घोषित केले आहे. 2008 मध्ये मुंबईत (Mumbai) झालेल्या या अमानुष दहशतवादी हल्ल्यात 166 निष्पाप लोकांचा जीव गेला होता. गेल्या काही काळापासून पाकिस्तानात भारतविरोधी कट रचणाऱ्या आणि दहशतवादी कारवायांमध्ये सहभागी असलेल्या अनेक कुख्यात दहशतवाद्यांची एकापाठोपाठ एक अज्ञात बंदूकधाऱ्यांकडून हत्या केली जात आहे.

हाफिज जुल्फिकारची ही हत्या सुद्धा त्याच मालिकेचा भाग असल्याचे बोलले जात असून पाकिस्तानमधील गुप्तचर यंत्रणांचे धाबे दणाणले आहेत. जैश-ए-मोहम्मदसाठी तरुणांना भडकावून दहशतवादाच्या मार्गावर आणण्याचे काम जुल्फिकार करत होता. या घटनेमुळे पाकिस्तानात पुन्हा एकदा 'अज्ञात बंदूकधाऱ्याची' दहशत पसरली असून, भारताच्या शत्रूंचा खात्मा पाकिस्तानातच होत असल्याचे पाहून सोशल मीडियावर भारतीयांकडून यावर जोरदार प्रतिक्रिया उमटत आहेत.