Coronavirus Vaccine: जगभरात कोरोनाचा प्रसार पुन्हा वाढू लागला असतानाच रशियामधून एक धक्कादायक बातमी समोर आली आहे. रशियाच्या अँटी-कोविड-19 लस 'स्पुतनिक व्ही' बनवण्यामध्ये सक्रीय असणाऱ्या शास्त्रज्ञांपैकी एक आंद्रे बोटीकोव्ह यांची त्यांच्याच राहत्या घरी बेल्टने गळा दाबून हत्या करण्यात आली.

या हत्येप्रकरणी पोलिसांनी एका संशयिताला अटक केली आहे. रशियन मीडियाने दिलेल्या बातमीत ही माहिती देण्यात आली आहे.

दरम्यान, रशियन वृत्तसंस्था टासने रशियन फेडरेशनच्या तपास समितीच्या हवाल्याने म्हटले आहे की, गमलेया नॅशनल रिसर्च सेंटर फॉर इकोलॉजी अँड मॅथेमॅटिक्समध्ये वरिष्ठ संशोधक म्हणून काम करणारे 47 वर्षीय बोटीकोव्ह गुरुवारी त्यांच्या अपार्टमेंटमध्ये मृतावस्थेत आढळून आले होते.

दुसरीकडे, रशियन राष्ट्राध्यक्ष व्लादिमीर पुतिन (Vladimir Putin) यांनी 2021 मध्ये कोरोना लसीबद्दल बोटीकोव्ह यांना 'ऑर्डर ऑफ मेरिट फॉर द फादरलँड' पुरस्काराने सन्मानित केले आहे.

अहवालानुसार, 2020 मध्ये 'स्पुतनिक V' लस विकसित करणाऱ्या 18 शास्त्रज्ञांपैकी बोटीकोव्ह एक होते. या प्रकरणाची चौकशी करणार्‍या समितीने टेलिग्रामवर दिलेल्या निवेदनात म्हटले आहे की, हत्येचा गुन्हा म्हणून तपास केला जाईल.

अहवालात पुढे म्हटले आहे की, तपासकर्त्यांच्या म्हणण्यानुसार, 29 वर्षीय तरुणाने एका भांडणाच्या वेळी बोटीकोव्ह यांचा बेल्टने गळा दाबला आणि पळून गेला. फेडरल इन्व्हेस्टिगेशन एजन्सीनुसार, त्या संशयिताला अटक (Arrested) करण्यात आली आहे.