पाच वर्षांपूर्वी जगभरात थैमान घालणाऱ्या कोरोनाने पुन्हा एकदा तोंड वर काढलंय. विशेषतः सिंगापूर, हाँगकाँग, बँकॉक आणि आग्नेय आशियातील काही देशांमध्ये कोविड-१९ च्या रुग्णसंख्येत मोठी वाढ होत आहे. या पार्श्वभूमीवर वैद्यकीय तज्ज्ञांनी चिंता व्यक्त केली असून, नागरिकांना सावधगिरी बाळगण्याचे आवाहन करण्यात आले आहे.

समोर आलेल्या आकडेवारीनुसार, या महिन्यात सिंगापूरमध्ये १४,२०० हून अधिक कोविड प्रकरणे नोंदवली गेली आहेत. ही संख्या गेल्या वर्षीच्या तुलनेत तब्बल २८ टक्क्यांनी अधिक आहे. विशेष म्हणजे, या वाढीमुळे सिंगापूरसह संपूर्ण आशिया खंडात पुन्हा एकदा कोविडची छाया गडद होताना दिसत आहे.

सिंगापूरमध्ये सध्या वाढणाऱ्या कोविड प्रकरणांमागे LF.7 आणि NB.1 हे व्हेरिएंट कारणीभूत आहेत. हे व्हेरिएंट JN.1 समूहातील असून, सध्या नोंदवण्यात येणाऱ्या दोन तृतीयांशपेक्षा जास्त प्रकरणे या प्रकारांशी संबंधित आहेत. या व्हेरिएंटमुळे बाधितांमध्ये नाक वाहणे, घसा खवखवणे, ताप आणि सौम्य थकवा यांसारखी लक्षणे दिसून येत आहेत.

आरोग्य यंत्रणा सतर्क

सिंगापूरच्या आरोग्य मंत्रालयाने जाहीर केले की, कोविड प्रकरणांमध्ये वाढ होत असली तरी स्थिती नियंत्रणात आहे. रुग्णालयात दाखल होणाऱ्या रुग्णांची संख्या देखील वाढली असून, मागील आठवड्याच्या तुलनेत ती १०२ वरून १३३ पर्यंत गेली आहे.

मात्र, सद्यस्थितीत हे नवे व्हेरिएंट अधिक घातक किंवा जास्त संसर्गजन्य असल्याचे कोणतेही ठोस पुरावे अद्याप उपलब्ध नाहीत, असंही मंत्रालयानं स्पष्ट केलं.

भारतासाठी धोक्याची घंटा?

दरम्यान, भारतात सध्या कोरोनाचे केवळ ९३ सक्रिय रुग्ण असल्याची माहिती केंद्रीय आरोग्य मंत्रालयाने दिली आहे. आरोग्य तज्ज्ञांनी स्पष्ट केले आहे की भारतात कोविडच्या नव्या लाटेचे सध्या कोणतेही संकेत नाहीत. तरीही सतर्क राहण्याचे आवाहन करण्यात आले आहे.

विशेषतः लहान मुले, वृद्ध नागरिक आणि रोगप्रतिकारक शक्ती कमी असलेल्या व्यक्तींनी विशेष काळजी घ्यावी, असा सल्लाही डॉक्टरांनी दिला आहे.