कोरोनाचा संसर्ग झपाट्याने वाढल्यानंतर चीनची आर्थिक राजधानी शांघायमध्ये लॉकडाऊन लागू करण्यात आला आहे. शहरातील अडीच कोटींहून अधिक लोक सध्या त्यांच्या घरात बंद आहेत. याशिवाय चीनच्या जिलिन प्रांतासह इतर अनेक शहरांमध्ये देखील कोरोनाचा झपाट्याने प्रसार सुरू आहे. देशात 2020 सारखे वातावरण पहायला मिळत आहे.

स्थानिक प्रशासनाच्या म्हणण्यानुसार, शांघाय आणि आजूबाजूचे भाग सोमवार ते शुक्रवार या कालावधीत बंद राहतील. लॉकडाऊनच्या (Lockdown) दुसऱ्या टप्प्यात शुक्रवारपासून शहरात पाच दिवस संचारबंदी असणार आहे. लोकांना घरातच राहावे लागेल. कार्यालये आणि व्यावसायिक आस्थापने बंद राहतील आणि सार्वजनिक वाहतूक सेवा देखील निलंबित राहतील.

शांघाय डिस्ने पार्क आधीच बंद करण्यात आले आहे. चीनमध्ये या महिन्यात 56,000 हून अधिक संक्रमित लोक आढळल्यानंतर सरकारने लॉकडाऊनचा निर्णय घेतला. हंगपू नदीला लागून असलेल्या शहरात नऊ दिवसांचा लॉकडाऊन लागू करण्यात आला आहे. यापूर्वी, सरकार येथे लॉकडाऊन लागू करण्यास नकार देत होते. चीनमध्ये (China) गेल्या 24 तासांत 1,219 प्रकरणे समोर आली आहेत.

दक्षिण कोरिया आणि हाँगकाँगमध्येही गंभीर परिस्थिती
सोमवारी, दक्षिण कोरियामध्ये (South Korea) 24 तासांच्या कालावधीत संसर्गाची 1,87,213 नवीन प्रकरणे नोंदवली गेली आहेत. देशातील गंभीर रुग्णांची संख्या सध्या 1,273 च्या विक्रमी पातळीवर आहे. हाँगकाँगमध्ये एका दिवसात 7,685 नवीन रुग्ण आढळले आहेत.