अमेरिकेतील न्यूयॉर्क शहरात लहान पंख असलेल्या किटकांनी धुमाकूळ घातला आहे. किटकांच्या वाढत्या प्रादुर्भावामुळे शहरातील नागरिकांमध्ये भीतीचे वातावरण आहे. सोशल मीडियावर या कीटकांचे फोटो व्हायरल होत आहेत.

कीटकांमुळे गंभीर आजार होऊ शकतात असा काही लोक दावा करत आहेत. तर काही लोक संसर्गाची तुलना प्लेगशी देखील करत आहेत.

मॅनहॅटन, ब्रुकलिनच्या आसपास असणारे लहान कीटक पादचारी आणि सायकलस्वारांसाठी उपद्रव बनले आहेत. या कीटकांनी मेट्रो प्लॅटफॉर्म, मॉल्स आणि इतर सार्वजनिक ठिकाणे त्यांचे निवासस्थान केले आहे. या किड्यांबद्दल स्थानिक लोक सोशल मीडियावर जोरदार भाष्य करत आहेत.

एका ट्विटर युजरने उडणाऱ्या कीटकांची व्हिडिओ क्लिप शेअर केली आहे. हे कीडे आपल्या सर्वांसाठी एक नवीन समस्या बनले आहेत. लहान असल्याने ते आपल्या केसात, कपड्यात आणि नाकातही शिरत आहेत. हे कीटक डासांपेक्षा लहान असल्याचा दावा युजरने केला आहे.

आणखी एका युजरने याबाबत ट्विट केले आहे. न्यूयॉर्कमध्ये काय चालले आहे ते कोणी सांगू शकेल का? सुरुवातीला मला वाटले की हा खराब हवेच्या गुणवत्तेमुळे होत आहे, परंतु नंतर मला समजले की माझ्या शरीरावर असलेले हे सर्व लहान कण कीटक आहेत.

शहरात दिसणारे हे कीटक पंख असलेले ऍफिड आहेत. असे असोसिएटेड प्रेसच्या हवाल्याने सिटी युनिव्हर्सिटीचे कीटकशास्त्रज्ञ प्रोफेसर डेव्हिड लोहमन यांनी म्हटले आहे.

न्यूयॉर्क टाइम्सच्या वृत्तानुसार, कॉर्नेल विद्यापीठाचे प्राध्यापक डॉ. कोरी मॉरो यांनी म्हटले आहे की, अचानक ऍफिडचा हल्ला असामान्य आहे, परंतु घाबरण्याचे कारण नाही. हा हवामानाचा परिणाम आहे. असे त्यांनी म्हटले आहे.

ऍफिड्सबद्दल मनोरंजक गोष्ट अशी आहे की ते सामान्यतः पार्थेनोजेनेटिक असतात, म्हणजे मादी मादींना जन्म देतात जेणेकरून त्यांची लोकसंख्या योग्य पर्यावरणीय परिस्थितीत वाढू शकेल. असे मोरो म्हणाले आहेत.

उच्च तापमान, वाढलेली आर्द्रता आणि नुकताच झालेला पाऊस हे या संसर्गाचे कारण आहे. कीटकांचा उपद्रव होत असला तरी, कीटकांमुळे आरोग्याला धोका नाही. असे न्यूयॉर्क शहर आरोग्य विभागाने एका निवेदनात म्हटले आहे.