Bangladesh Oxygen Plant Blast: बांगलादेशातील दक्षिण-पूर्व भागात एका ऑक्सिजन प्रकल्पात झालेल्या भीषण स्फोटामुळे मोठी जीवितहानी झाली. या स्फोटात आतापर्यंत 6 जणांचा होरपळून मृत्यू झाला आहे. तर, 30 जण गंभीर जखमी झाल्याची माहिती समोर येत आहे. या स्फोटात घटनास्थळापासून दोन चौरस किलोमीटर अंतरावर असलेल्या इमारतींनाही हादरा बसला आहे.

बांगलादेशातील चित्तगाँगच्या सीताकुंडा उपजिला परिसरात शनिवारी दुपारी ही दुर्घटना घडली आहे. या घटनेची माहिती मिळताच अग्निशमन दलाचे जवान घटनस्थळी दाखल झाले होते.

अग्निशमन दलाच्या जवानांकडून बचाव कार्य सुरू आहे. या स्फोटात अनेकजण गंभीर जखमी झाल्याने मृतांची संख्येत वाढ होण्याची शक्यता आहे. हा स्फोट नेमका कशामुळे झाला याचे कारण अद्याप माहिती पडले नाही.

बांगलादेशची सरकारी अधिकारी शहादत हुसेन यांनी दिलेल्या माहितीनुसार, "या दुर्घटनेत आतापर्यंत सहा जणांना आपला जीव गमवावा लागला आहे. येथे बचावकार्य सुरू असून मृतांच्या संख्येत वाढ होण्याची शक्यता वर्तवली जात आहे. ऑक्सिजन प्रकल्पाच्या आजुबाजुच्या इमारतीही हादरल्याने लोकांमध्ये भीतीचं वातावरण आहे."