International Criminal Court: शेख हसीना यांनी बांगलादेश सोडून तीन महिने उलटले तरी तेथील राजकीय स्थिती अद्याप स्थीर नाहीये. यातच आता, शेख हसीना यांच्या पक्षाने (अवामी लीग) नेदरलँड्सस्थित आंतरराष्ट्रीय फौजदारी न्यायालयात (ICC) अंतरिम सरकारचे प्रमुख मोहम्मद युनूस आणि अन्य 61 जणांविरुद्ध धाव घेतली आहे.

'आंदोलनाच्या नावाखाली क्रूर हत्याकांड'

अवामी लीगचे नेते आणि सिल्हेटचे माजी महापौर अन्वरझ्झमन चौधरी यांनी एक व्हिडिओ संदेश जारी करुन सांगितले की, "बांगलादेशमध्ये 5 ते 8 ऑगस्ट या कालावधीत विद्यार्थी आंदोलनाच्या नावाखाली एक क्रूर हत्याकांड घडले, ज्यामध्ये अवामी लीगचे नेते-कार्यकर्ते आणि त्यांचे विविध सहकारी तसेच, हिंदू, ख्रिश्चन, बौद्ध आणि बांगलादेशी पोलिस दलांना लक्ष्य करण्यात आले. आम्ही यासंदर्भातील सर्व पुरावे आंतरराष्ट्रीय फौजदारी न्यायालयात सादर केले आहेत."

800 पानांचा दस्तऐवज आंतरराष्ट्रीय न्यायालयात पाठवला

मोहम्मद युनूस यांच्या व्यतिरिक्त आरोपींमध्ये त्यांच्या मंत्रिमंडळातील सर्व सदस्य आणि आंदोलक विद्यार्थी नेते यांचा समावेश आहे. व्हिडिओ संदेशात चौधरी यांनी पुढे सांगितले की, ''त्यांनी आयसीसीकडे केलेल्या तक्रारीत सुमारे 800 पानांचा दस्तऐवज पाठवला आहे.'' लवकरच आंतरराष्ट्रीय फौजदारी न्यायालयात आणखी 15 हजार तक्रारी दाखल होतील, त्यासाठी तयारी सुरु असल्याचे त्यांनी सांगितले. एवढ्यावरच न थांबता या हिंसाचारातील पीडित महिला एकामागून एक तक्रारी दाखल करणार असल्याचेही त्यांनी सांगितले.

अवामी लीगला रॅली काढण्याची परवानगी नाही

बांगलादेशच्या अंतरिम सरकारने शनिवारी (9 नोव्हेंबर 2024) अवामी लीगला 'फॅसिस्ट' म्हणून संबोधले. सरकारकडून सांगण्यात आले की, ते रविवारी (10 नोव्हेंबर 2024) होणारी प्रस्तावित अवामी लीगच्या रॅलीला परवानगी देणार नाहीत. अंतरिम सरकारचे प्रमुख मोहम्मद युनूस यांचे प्रेस सचिव शफीकुल आलम यांनी एका फेसबुक पोस्टमध्ये म्हटले की, अंतरिम सरकार कोणत्याही प्रकारचा हिंसाचार किंवा देशातील कायदा आणि सुव्यवस्था बिघडवण्याचा कोणताही प्रयत्न सहन करणार नाही.

आलम यांनी इशारा दिला की, "जो कोणी सामूहिक हत्याकांड आणि हुकूमशहा शेख हसीना यांचा संदेश घेऊन रॅली, सभा आणि मिरवणुका काढण्याचा प्रयत्न करेल त्याच्याविरुद्ध कडक कारवाई केली जाईल.''