Pakistan Army New Chief: प्रदीर्घ प्रतिक्षेनंतर अखेर आज पाकिस्तानला नवा लष्करप्रमुख मिळाला आहे. असीम मुनीर यांच्याकडे पाक लष्कराची कमान देण्यात आली आहे. तर शमशाद मिर्झा आता लष्कराच्या जॉइंट चीफ ऑफ स्टाफ असतील. पाकिस्तानचे पंतप्रधान शाहबाज शरीफ यांनी या नियुक्त्यांना मंजुरी दिली आहे.

दरम्यान, लेफ्टनंट जनरल असीम मुनीर हे पाकिस्तानी लष्कराचे (Pakistan Army) नवे प्रमुख असतील. ते सध्याचे लष्करप्रमुख जनरल कमर जावेद बाजवा यांची जागा घेतील, जे 29 नोव्हेंबर रोजी निवृत्त होत आहेत. माहिती आणि प्रसारण मंत्री मरियम औरंगजेब यांनी सांगितले की, "पाकिस्तानचे पंतप्रधान शाहबाज शरीफ (Shehbaz Sharif) यांनी लेफ्टनंट जनरल साहिर शमशाद मिर्झा यांना जॉइंट चीफ ऑफ स्टाफ म्हणून आणि लेफ्टनंट जनरल सय्यद असीम मुनीर यांना लष्करप्रमुख म्हणून नियुक्त करण्याचा निर्णय घेतला आहे."

दुसरीकडे, लेफ्टनंट जनरल मुनीर यांना फ्रंटियर फोर्स रेजिमेंटमध्ये नियुक्त करण्यात आले होते. तर जनरल बाजवा यांच्या नेतृत्वाखाली ब्रिगेडियर म्हणून दलाची कमान घेतल्यापासून ते बाहेर जाणार्‍या सीओएएसचे जवळचे सहकारी राहीले. जनरल बाजवा हे त्यावेळी एक्स कॉर्प्सचे कमांडर होते.

मुनीर हे आयएसआय प्रमुख राहिले आहेत

2017 च्या सुरुवातीला मुनीर यांना लष्करी गुप्तचर विभागाचे प्रमुख म्हणून नियुक्त करण्यात आले होते. पुढील वर्षी ऑक्टोबरमध्ये त्यांना ISI प्रमुख बनवण्यात आले. तथापि, सर्वोच्च गुप्तचर अधिकारी म्हणून त्यांचा कार्यकाळ हा आतापर्यंतचा सर्वात लहान ठरला, कारण तत्कालीन पंतप्रधान इम्रान खान यांच्या आग्रहावरुन त्यांची आठ महिन्यांच्या आत लेफ्टनंट-जनरल फैझ हमीद यांनी बदली केली होती.