न्यूयॉर्क: ‘अॅपल’ कंपनीकडून ‘एक्स’ आणि ‘ग्रोक एआय चॅटबॉट अॅप’ यांना शिफारस केलेल्या ‘अॅप’मध्ये समाविष्ट न केल्याबद्दल उद्योजक आणि ‘स्पेस एक्स’चे प्रमुख एलॉन मस्क ‘अॅपल’ कंपनीविरोधात दावा दाखल करणार आहेत.

मस्क यांनी ‘एक्स’ अकाउंटवर याबाबत नाराजी व्यक्त केली आहे. ‘अॅपल’ वापरणाऱ्या ‘यूझर’ला काही ‘अॅप’ची शिफारस केली जाते. मात्र, त्यामध्ये ‘एक्स’ आणि ‘ग्रोक एआय चॅटबॉट’चा समावेश नाही. याविरोधात कायदेशीर लढाई लढण्याची आवश्यक आहे. विशिष्ट कंपन्यांनाच ‘अॅपल’कडून झुकते माप दिले जात आहे.

एलन मस्क यांनी या मुद्द्यावरून ‘अॅपल’वर जोरदार टीका केली आहे. त्यांच्या म्हणण्यानुसार, ‘अॅपल’च्या ‘अॅप स्टोअर’ धोरणामुळे ‘ओपन एआय’व्यतिरिक्त इतर कोणत्याही ‘एआय’ कंपनीला पहिली रँक मिळणे अशक्य झाले आहे. ही स्पष्टपणे मक्तेदारी आहे. त्यामुळे, मस्क यांच्या कंपनीने ‘अॅपल’विरुद्ध लगेच कायदेशीर कारवाई करण्याचा निर्णय घेतला आहे.

यापूर्वीही दंड

युरोपीय महासंघामधील २७ देशांच्या नियामकांनी एप्रिलमध्ये ‘अॅप स्टोअर’मध्ये नसलेल्या अन्य पर्यायांकडे जाण्यापासून यूझरना रोखल्याप्रकरणी नियमांचे उल्लंघन केल्याबद्दल ‘अॅपल’ला ५० कोटी युरोचा दंड ठोठावला. गेल्या वर्षी, महासंघाने अन्य एका प्रकरणात ‘अॅपल’ला दोन अब्ज अमेरिकी डॉलरचा दंड ठोठावला होता. ‘अॅपल म्युझिक स्टोअर’ला प्राधान्य देऊन ‘स्पॉटिफाय’सारख्या इतर ‘अॅप’साठी ‘यूझर’नी कसे पैसे द्यावेत, हे सांगण्यास मनाई केली होती. त्याबद्दल हा दंड ठोठविण्यात आला होता.

मस्क यांचा आक्षेप

‘अॅपल’च्या ‘अॅप स्टोअर’मध्ये ‘चॅट जीपीटी’ला प्राधान्य दिले जाते. ‘ग्रोक’ किंवा इतर ‘एआय अॅप’ची शिफारस केली जात नाही.

यामुळे ग्राहकांच्या निवडीवर परिणाम होतो आणि विशिष्ट कंपन्यांची मक्तेदारी राहते.

‘अॅपल’ने याबाबत कोणतीही अधिकृत प्रतिक्रिया दिलेली नाही. मात्र, गेल्या काही वर्षांत अॅपलवर अनेकदा ‘अँटीट्रस्ट’ उल्लंघनाचे आरोप झाले आहेत.