अफगाणिस्तानवर (Afghanistan) तालिबानने (Taliban) ताबा मिळवल्यानंतर देखील पंजशीर (Panjshir) प्रांतासाठी तालिबानचा संघर्ष सुरुच आहे. मात्र आता पंजशीरमध्ये प्रवेश केला असल्याचा दावा तालिबानकडून करण्यात आला होता. हा दावा आता पंजशीरमधील बंडखोरांनी फेटाळून लावला आहे. तालिबानी सैन्य पंजशीरमध्ये कोठेही घुसण्यास असमर्थ असल्याचे सांगत पंजशीरच्या बंडखोरांनी शनिवारी तालिबानचे हे दावे फेटाळून लावले आहेत.

टोलो न्यूजने दिलेल्या वृत्तानुसार, अहमद मसूदच्या समर्थकांनी तालिबानने पंजशीरच्या दिशेने कुच केल्याचा दावा फेटाळून लावताना कोणीही पंजशीर प्रांतात प्रवेश केला नसल्याचे स्पष्ट केले आहे. विद्रोही आघाडीच्या शिष्टमंडळाचे प्रमुख मोहम्मद अल्मास झाहिद म्हणाले, "पंजशीरमध्ये कोणतीही लढाई नाही आणि कोणीही पंजशीर प्रांतात प्रवेश केला नाही."

यापूर्वी तालिबानने दावा केला होता की, त्यांचे सैन्य पंजशीर प्रांतात घुसले आहे. तालिबानी नेता अनमुल्ला सामंगानी यांनी टोलो न्यूजला सांगितले की, कोणतीही लढाई झाली नाही, परंतु अफगाणिस्तानच्या इस्लामिक अमिरातचे मुजाहिदीन कोणत्याही प्रतिकाराचा सामना न करता वेगवेगळ्या दिशेने पुढे सरकले आहेत. इस्लामिक अमीरातच्या सैन्याने वेगवेगळ्या दिशांनी पंजशीरवर हल्ला केला असुन पंजशीरमध्ये प्रवेश केला आहे.

दरम्यान, पंचशीर खोरे हा असा भाग आहे जो, 1990 च्या गृहयुद्धात कधीच तालिबानच्या ताब्यात आला नव्हता. तसेच एक दशकापूर्वी (तत्कालीन) सोव्हिएत युनियनला देखील ते जिंकता आले नव्हते. आम्ही तालिबानला पंजशीरमध्ये प्रवेश करू देणार नाही, असे एका रहिवाशाने नाव न छापण्याच्या अटीवर सांगितले. आम्ही पुर्ण ताकदीने त्याला विरोध करू आणि लढू.