बर्लिन: जर्मनीतील गेल्सेंकिर्चेन शहरात असलेल्या स्पार्कस बँकेत २९० कोटी रुपयांची चोरी झाली. चोरांनी बँकेच्या पार्किंग गॅरेजच्या भिंतीला मोठे भगदाड पाडले आणि थेट तिजोरीपर्यंत पोहोचले. त्यानंतर त्यांनी ३,२५० हून अधिक सेफ डिपॉझिट लॉकर तोडले आणि त्यातील रोकड व मौल्यवान दागिने घेऊन पळ काढला.

पोलिसांनुसार, चोरांनी ही चोरी ख्रिसमसच्या सुट्ट्यांमध्ये केली, जेव्हा बहुतेक दुकाने आणि कार्यालये बंद होती. असे मानले जात आहे की, गुन्हेगारांनी हा काळ जाणूनबुजून निवडला जेणेकरून कोणालाही संशय येऊ नये आणि परिसरात लोकांची वर्दळही कमी असावी.

चोरीचा खुलासा २९ डिसेंबरच्या सकाळी झाला, जेव्हा बँकेचा फायर अलार्म वाजला. घटनास्थळी पोहोचलेल्या पोलिसांनी आणि बँक अधिकाऱ्यांनी पाहिले की, पार्किंगमधून बँकेच्या तिजोरीपर्यंत पोहोचण्यासाठी भिंतीला मोठे भगदाड पाडले होते. या कामासाठी मोठ्या ड्रिल मशीनचा वापर करण्यात आला होता.

पोलिसांनी सांगितले की, बँकेच्या आसपास राहणाऱ्या काही लोकांनी शनिवार रात्रीपासून रविवार सकाळपर्यंत अनेक मुखवटा घातलेल्या लोकांना मोठ्या पिशव्या घेऊन जाताना पाहिले होते. तसेच, सीसीटीव्ही कॅमेऱ्यांमध्ये काळ्या रंगाची ऑडी कारही दिसली आहे, ज्यात चोर बसले होते.

पोलिसांनी या संपूर्ण चोरीची तुलना हॉलिवूड चित्रपट 'ओशन इलेव्हन'शी केली आहे. अधिकाऱ्यांचे म्हणणे आहे की, इतकी मोठी आणि नियोजनाने केलेली चोरी अनेक दिवसांच्या तयारीशिवाय शक्य नव्हती. दुसरीकडे, स्पार्कस बँकेने म्हटले आहे की, बँक आपल्या ग्राहकांच्या पाठीशी उभी आहे आणि त्यांना पूर्ण सहकार्य केले जाईल.