'मी विहिरीत उडी मारुन मरुन जाईन, पण काँग्रेसमध्ये जाणार नाही. कारण काँग्रेसची विचारधारा आपल्याला पसंत नाही.' केंद्रिय मंत्री नितीन गडकरी (Nitin Gadkari) यांनी नागपूर येथे उद्योजकांच्या एका कार्यक्रमात बोलत असताना आपली जुनी आठवण सांगितली. भाजपचे जेष्ठ नेते आणि केंद्रिय मंत्री नितीन गडकरी यांना काही दिवसांपूर्वी भाजपाच्या संसदीय बोर्डातून हटवण्यात आले आहे.

नागपुरात उद्योजकांच्या एका कार्यक्रमात बोलताना नितीन गडकरी म्हणाले, 'कोणताही व्यक्ती पराभूत होतो, याचा अर्थ तो संपत नाही. मात्र जेव्हा तो स्वत: पराभव स्वीकारतो, त्याचवेळी तो संपतो. याचवेळी त्यांनी सध्याच्या वापरा आणि फेकून द्या या संस्कृतीचा भाग होऊ नका. जे ही कोणी व्यवसायात आहेत, सामाजिक कार्यात आहेत किंवा राजकारणात आहेत, त्यांच्यासाठी इतर माणसांशी त्यांचे असलेले संबंध ही सर्वात मोठी ताकद आहे.' असे गडकरी म्हणाले.

विहिरीत उडी मारेन पण काँग्रेसमध्ये जाणार नाही

नितीन गडकरी यांनी यावेळी आपला एक जुना किस्सा सांगितला. नितीन गडकरी म्हणाले, तरुण वयात विद्यार्थी चळवळीत काम करत असताना, काँग्रेसचे नेते श्रीकांत जिचकार यांनी आपल्याला काँग्रेसमध्ये प्रवेश करा, असे सांगितले होते. त्यावेळी गडकरी यांनी श्रीकांत जिचकार यांना, 'मी विहिरीत उडी मारुन मरुन जाईन, पण काँग्रेसमध्ये जाणार नाही. कारण काँग्रेसची विचारधारा आपल्याला पसंत नाही.' असे उत्तर दिल्याचे नितीन गडकरी यांनी कार्यक्रमात सांगितले.