लग्न म्हटलं की आनंदाचे क्षण, नातेवाईकांची गर्दी आणि पारंपरिक विधी डोळ्यासमोर येतात. प्रत्येक जोडप्याला आपलं लग्न संस्मरणीय आणि हटके व्हावं असं वाटत असतं. मात्र, सध्याच्या 'सोशल मीडिया' आणि 'रील्स'च्या जमान्यात आपली लग्नपत्रिका किंवा व्हिडिओ व्हायरल करण्यासाठी लोक कोणत्याही थराला जाताना दिसतात. असाच एक आगळावेगळा आणि अंगावर शहारे आणणारा व्हिडिओ सध्या इंटरनेटवर तुफान व्हायरल होत असून, यामध्ये वरमालेच्या वेळी चक्क दहीहंडीसारखा नजारा पाहायला मिळत आहे.

वरमालेच्या विधीला आले खेळाचे स्वरूप

हिंदू संस्कृतीत वरमालेचा विधी अत्यंत महत्त्वाचा आणि पवित्र मानला जातो. या विधीदरम्यान मित्रमंडळी आणि नातेवाईक नवरदेवाला किंवा नवरीला खांद्यावर उचलून धरतात, जेणेकरून समोरच्याला हार घालणे कठीण जावे. हे सर्व एका ठराविक मर्यादेत आणि हसण्या-खिदळण्याच्या वातावरणात घडते.

पण व्हायरल झालेल्या या व्हिडिओमध्ये ही गंमत एका वेगळ्याच स्तरावर पोहोचली आहे. नवरदेव आणि नवरी या दोघांच्याही बाजूच्या लोकांनी त्यांना खांद्यावर इतक्या उंचीवर उचलले की, तो विधी नसून एखादी दहीहंडीची स्पर्धाच सुरू आहे असे वाटत होते.

व्हिडिओमध्ये दिसते की, दोन्ही बाजूंच्या कार्यकर्त्यांमध्ये जणू एक स्पर्धाच लागली आहे की कोण आपल्या उमेदवाराला जास्त उंच नेऊ शकेल. जसजशी ही उंची वाढत गेली, तसतसा हा प्रकार अधिकच थरारक आणि धोकादायक वाटू लागला. उंचावर गेलेल्या नवरदेव आणि नवरीचा तोल जाण्याची दाट शक्यता निर्माण झाली होती. थोडी जरी चूक झाली असती, तर आनंदाच्या क्षणाचे रूपांतर मोठ्या दुर्घटनेत झाले असते. सुदैवाने, कोणताही अनुचित प्रकार न घडता हा सोहळा पार पडला, पण या 'स्टंट'मुळे उपस्थितांच्या काळजाचा ठोका मात्र चुकला होता.

नेटकऱ्यांच्या मजेशीर प्रतिक्रिया

हा व्हिडिओ सोशल मीडियावर येताच त्यावर कमेंट्सचा पाऊस पडू लागला आहे. काहींनी याला 'गोविंदा रे गोपाळा' म्हणत दाद दिली आहे, तर काहींनी लग्नासारख्या पवित्र विधीचा असा खेळ केल्याबद्दल नाराजी व्यक्त केली आहे. "लग्नासाठी आलात की दहीहंडीसाठी?" असा सवालही काही युजर्सनी विचारला आहे. केवळ प्रसिद्धी मिळवण्यासाठी असे जीवघेणे प्रयोग करणे कितपत योग्य आहे, असा विचार आता या निमित्ताने सोशल मीडियावरील जाणकार व्यक्त करत आहेत.