Unique Cricket Bowling Action: सोशल मीडिया हे एक असे प्लॅटफॉर्म आहे, जिथे दररोज नवनवीन आणि अकल्पनीय गोष्टी पाहायला मिळतात. अनेकदा असे व्हिडिओ समोर येतात जे पाहून युजर्सना आपल्या डोळ्यांवर विश्वास बसत नाही. तुम्हीही सोशल मीडियावर सक्रिय असाल, तर तुमच्या फीडवर अनेकदा असे हटके व्हिडिओ येत असतील जे त्यांच्या वेगळेपणामुळे व्हायरल होतात. सध्या अशाच एका क्रिकेट सामन्याचा व्हिडिओ इंटरनेटवर धुमाकूळ घालत आहे, ज्यातील गोलंदाजाची शैली पाहून क्रिकेटप्रेमी अवाक झाले आहेत.

व्हायरल होत असलेल्या या व्हिडिओमध्ये टेनिस बॉलने क्रिकेटचा (Cricket) सामना खेळला जात असल्याचे दिसत आहे. या व्हिडिओच्या आकर्षणाचे मुख्य केंद्र म्हणजे गोलंदाजी करणाऱ्या मुलाची 'ॲक्शन'. सामान्यतः गोलंदाज आपला हात समोरुन किंवा बाजूने गोल फिरवून चेंडू फेकतात, मात्र या मुलाची पद्धत पूर्णपणे वेगळी आणि चकित करणारी आहे. हा मुलगा चेंडू फेकताना आपला उजवा हात पाठीच्या मागे नेतो आणि चेंडू विरुद्ध दिशेने म्हणजेच डाव्या बाजूने बाहेर काढत समोर फेकतो. व्हिडिओमध्ये तो अशा प्रकारे सलग तीन चेंडू टाकताना दिसतो आणि विशेष म्हणजे हे तिन्ही चेंडू 'डॉट' जातात, ज्यावर फलंदाजाला एकही धाव काढता येत नाही.

हा गोलंदाज नेमका कोण आहे आणि हा सामना कुठे सुरु आहे, याची अधिकृत माहिती अद्याप समोर आलेली नाही. हा व्हिडिओ 'X' वर @Mukeshbaitu नावाच्या अकाऊंटवरुन शेअर करण्यात आला. या व्हिडिओला "भावा, ही कोणती बॉलिंग ॲक्शन आहे?" असे कॅप्शन देण्यात आले. हा व्हिडिओ आतापर्यंत हजारो लोकांनी पाहिला असून त्यावर मजेशीर आणि कौतुकास्पद कमेंट्स येत आहेत.

एका युजरने "ही तर जबरदस्त ॲक्शन आहे" असे म्हटले, तर दुसऱ्याने "भावाकडे काय कला आहे!" अशा शब्दात त्याचे कौतुक केले आहे. एका युजरने तर चक्क विराट कोहलीचा चष्मा काढून थक्क झाल्याचा 'GIF' शेअर करुन आपली प्रतिक्रिया दिली आहे. या अजब गोलंदाजीने सध्या क्रिकेट विश्वात आणि सोशल मीडियावर (Social Media) चर्चेचे उधाण आणले आहे.