हिंदू धर्मात जगन्नाथ रथयात्रेला अत्यंत महत्त्वाचं स्थान आहे. दरवर्षी आषाढ शुद्ध द्वितीयेपासून सुरू होणारी ही यात्रा देशभरात मोठ्या श्रद्धेने आणि उत्साहाने साजरी केली जाते. आजपासून या वर्षीच्या जगन्नाथ रथयात्रेला देखील मोठ्या थाटामाटात सुरुवात झाली आहे. भाविकांच्या जयघोषाने संपूर्ण परिसर दुमदुमून गेला आहे.

यंदाही रथयात्रेचा उत्सव विविध शहरांमध्ये मोठ्या प्रमाणात साजरा करण्यात येत आहे. सोशल मिडियावरही या यात्रेचे विविध व्हिडिओ आणि फोटो जोरदार व्हायरल होत आहेत. मात्र, गुजरातमधून समोर आलेला एक व्हिडिओ सध्या विशेष चर्चेत आहे. या व्हिडिओमध्ये थरारक दृश्य पाहायला मिळत आहेत.

पीटीआय या वृत्तसंस्थेने एक्सवर शेअर केलेल्या या व्हिडिओमध्ये, गुजरातमधील रथयात्रेदरम्यान तीन हत्ती अचानक नियंत्रणाबाहेर गेले असल्याचं दिसतं. गर्दीने फुललेल्या रस्त्यावर हत्ती चवताळल्यामुळे एकच गोंधळ उडाला.

हत्तींच्या रौद्र रूपामुळे लोकांनी जीव वाचवण्यासाठी पळ काढला. काही ठिकाणी घबरलेल्या लोकांनी दुकानं आणि रस्त्याच्या बाजूला लपण्याचा प्रयत्न केल्याचंही या दृश्यांमध्ये दिसतं.

सुदैवाने या घटनेत कोणतीही मोठी जीवितहानी झाली नसल्याची प्राथमिक माहिती आहे. मात्र, काही वाहनांचे आणि रथयात्रेच्या सजावटीचे नुकसान झाल्याची शक्यता वर्तवली जात आहे. स्थानिक प्रशासन आणि सुरक्षादलाने तत्काळ हस्तक्षेप करत परिस्थिती नियंत्रणात आणली. हा संपूर्ण प्रकार मोबाईल कॅमेऱ्यात कैद झाला असून संबंधित व्हिडिओ सोशल मीडियावर जोरदार व्हायरल होत आहे.