लोकांचा राहणीमानाचा दर्जा उंचावला असला तरी मानसिकतेचा दर्जा ढासळलाच असल्याची प्रचिती या एका घटनेने पुन्हा झाली. दोघांचा राजाराणीचा संसार सुरू असतांना वंशाला दिवा पाहिजे या अट्टहासापोटी समजातील कितीतरी महिलांवर अजूनही अन्याय अत्याचार होतच आहे

असेच काहीसे या घटनेबाबतही घडले आहे. उत्तर प्रदेशचे हे दाम्पत्य असून त्यांनी 2013 मध्ये लग्न केले होते. मुलाला जन्म न दिल्याने महिलेच्या पतीने तिच्यावर उकळते पाणी ओतले. आणि 32 वर्षीय महिलेला तीच्या पतीने गंभीर दुखापत केली, अशी माहिती पोलीस अधीक्षक (ग्रामीण) संजीव बाजपेयी, यांनी बुधवारी दिली. या जोडप्याला तीन मुली आहेत, त्यातील सर्वात लहान मुलीचा गेल्याच वर्षी जन्म झाला आहे.

संजूचा पती सत्यपाल तिच्यावर आई -वडिलांकडून 50,000 रूपये आणण्यासाठी दबाव आणत होता. संजूला तीन मुली असल्याने तो तीच्यावर अत्याचार करायचा कारण त्याला वंशाचा दिवा म्हणजे मुलगा हवा होता. पोलिस तक्रारीचा हवाला देत बाजपेयी यांनी सांगितले की, 'सत्यपाल आपल्या पत्नीला त्रास देत तिला उपाशी ठेवायचा जेवण द्यायचा नाही.' अशातच संतापलेल्या सत्यपालने 13 ऑगस्ट रोजी संजूवर उकळते पाणी ओतले, आणि तिला गंभीर इजा झाली. त्यानंतर तिला जवळच्या रुग्णालयात दाखल करण्यात आले. संजूच्या वडिलांनी या घटनेची माहिती दिल्यानंतर तक्रार दाखल करण्यात आली आणि सत्यपालवर बुधवारी गुन्हा दाखल करण्यात आला.

मात्र या घटनेतील आरोपी सत्यपाल फरार असल्याने त्याला अटक करण्यात आली नाही, त्याचबरोबर पुढील तपास सुरू असल्याची माहिती पोलीसांनी दिली.