Uttar Pradesh Government Hospitals: उत्तरप्रदेशातील सरकारी रुग्णालयांची नावे आता हिंदीसह उर्दूमध्ये लिहिली जाणार आहेत. वैद्यकीय आणि आरोग्य विभागाने या सूचना सर्व जिल्ह्यांच्या मुख्य वैद्यकीय अधिकाऱ्यांना दिल्या आहेत. वैद्यकीय आणि कुटुंब कल्याण विभागातील सर्व अधिकारी त्यांच्या नावाच्या फलकांवर हिंदी आणि उर्दूमध्ये नावे लिहितील.

दरम्यान, उन्नाव येथील रहिवासी असलेल्या मोहम्मद हारुण नावाच्या व्यक्तीने पत्र लिहून तक्रार केली होती की, 'दुसरी अधिकृत भाषा म्हणून उर्दूला मान्यता असूनही उत्तर प्रदेशातील (Uttar Pradesh) विविध विभागांमध्ये त्याचे पालन होत नाही. यासंबंधीची तक्रार वैद्यकीय आणि आरोग्य विभागाकडेही करण्यात आली होती.' त्यानंतर आदेशाचे पालन करण्याच्या सूचना राज्याचे आरोग्य केंद्र संचालक डॉ.शैलेश यांनी दिल्या.

या आदेशानंतर, यूपीमधील 167 सरकारी जिल्हा रुग्णालये, 873 सामुदायिक आरोग्य केंद्र (CHC) आणि 2934 प्राथमिक आरोग्य केंद्रांची नावे हिंदी आणि उर्दूमध्ये लिहिली जातील. यासोबतच विभागातील इतर अधिकारी आणि कर्मचारीही त्यांच्या नावाच्या फलकांवर हिंदी आणि उर्दूमध्ये नावे लिहितील.

भाषा विभागाने 1989 मध्ये अधिसूचना जारी केली होती

7 ऑक्टोबर 1989 रोजी भाषा विभागाने उर्दूला द्वितीय अधिकृत भाषेचा दर्जा देणारी अधिसूचना जारी केली होती. 19 नोव्हेंबर 1990 रोजी या संदर्भातील अध्यादेश जारी करण्यात आला होता. दरम्यान, या आदेशाचे पालन करण्याच्या सूचनाही देण्यात आल्या होत्या. मात्र, त्याचे काटेकोरपणे पालन होत नव्हते. आता पुन्हा एकदा वैद्यकीय आणि आरोग्य विभागाने यासंदर्भात सूचना जारी केल्या आहेत.