Udaipur Murder Case: कन्हैयालालच्या हत्येप्रकरणी अटक करण्यात आलेल्या आठव्या आरोपीला राष्ट्रीय तपास यंत्रणेने (एनआयए) चार दिवसांची कोठडी सुनावली आहे. आरोपीला शनिवारी विशेष एनआयए न्यायालयात हजर करण्यात आले. आरोपीची कसून चौकशी केली जात असून त्यात आणखी रहस्ये बाहेर येण्याची शक्यता आहे.

दरम्यान, 19 वर्षीय मुहम्मद जावेदने कन्हैयालालच्या हत्येच्या कटात महत्त्वाची भूमिका बजावली होती, असे अटकेनंतर एका निवेदनात तपास यंत्रणेने म्हटले आहे. न्यायालयाने आरोपीला 27 जुलैपर्यंत कोठडी सुनावली.

दुसरीकडे, अख्तारी, गौस, मोहसीन, आसिफ, मोहम्मद मोहसीन, वसीम अली आणि फरहाद मोहम्मद शेख यांच्यासह सात आरोपींना (Accused) कडेकोट बंदोबस्तात न्यायालयात हजर करण्यात आले होते. विशेष सरकारी वकील टीपी शर्मा यांनी सांगितले की, न्यायालयाने अख्तारी, घौस आणि शेख यांची एनआयए (NIA) कोठडीत आणि इतर चौघांना न्यायालयीन कोठडीत पाठवले.

तसेच, मुख्य आरोपी अख्तारी आणि गौस यांच्याशिवाय इतरांना कटात सहभागी असल्याच्या आरोपावरुन अटक करण्यात आली. सर्व आरोपींवर UAPA अंतर्गत आरोप ठेवण्यात आले आहेत. यापूर्वी त्यांना 12 जुलैपर्यंत एनआयए कोठडीत पाठवण्यात आले होते.