नागपूर: ‘‘तुर्कियेचे विमान व त्यांनी कथितरित्या पाठवलेली शस्त्रास्त्रांची मदत पाकला मिळाली तरी ती विमाने आणि शस्त्रे त्यांना लगेच वापरता येणार नाहीत. त्यासाठी प्रशिक्षण गरजेचे आहे,’’ असे मत मेजर जनरल (निवृत्त) अनिल बाम यांनी नमूद केले.

पाक सैन्याच्या सध्याच्या अवस्थेवर भाष्य करताना त्यांनी पत्रकारांशी संवाद साधला. तर, सध्या पाक वापरत असलेली क्षेपणास्त्रे चिनी बनावटीची असल्याने पाकिस्तानला पराभव निश्चित असल्याचे कळून चुकले आहे असे बाम म्हणाले.

‘‘पाकिस्तान चिनी बनावटीच्या शस्त्रांवर अवलंबून आहे. पाकिस्तानचे एचक्यू-९ किती तकलादू आहे हे आपण पाहतो आहे. लाहोरमध्ये आठ मे रोजी काय घडले हे आपण पाहिले. पाकिस्तानी क्षेपणास्त्रे भारताने नेस्तनाबूत केल्या. देशामध्ये पडलेला त्याचे अवशेष पाहिल्यास त्यावर मेड इन चायना लिहिलेले आढळते. चिनी शस्त्रे कधीच सिद्ध नसतात. सहा-सात वर्षांपूर्वी चीनने हे शस्त्रे पाकिस्तानला पुरवले आहेत. भारताला या शस्त्रांची बनावट माहिती होती,’’ असे मेजर जनरल बाम यांनी नमूद केले.

चोरीचे तंत्रज्ञान

‘‘पाकिस्तानकडील चिनी बनावटीचे एचक्यू-९ ही हवाई संरक्षण प्रणाली इतरांकडून चोरलेल्या तंत्रावर आधारित आहे. रशियाच्या एस-३०० आणि अमेरिकेच्या पेट्रोयेट डिफेन्स सिस्टिमची कॉपी करून चीनने ते बनविले आहे. पाकिस्तानने भारताविरोधात हेच चोरलेल्या तंत्रावर आधारित ‘एचक्यू-९’ वापरत आहे, असेही मेजर जनरल म्हणाले.

ते स्व-संरक्षणात तरबेज

पाकिस्तान ने काल जम्मू काश्मीरचा सीमेवर अनेक जिल्ह्यात हल्ले करण्याचा प्रयत्न केला. मात्र, नुकसान पोहोचवू शकले नाही. कारण, तिथली जनता सिव्हिल डिफेन्स (स्व-संरक्षण) बद्दल तरबेज आहे, अशी स्तुतीसुमने मेजर जनरल अनिल बाम यांनी उधळली.