Travis Head And Mitchell Marsh Record: ऑस्ट्रेलिया आणि दक्षिण आफ्रिका यांच्यातील तिसरा एकदिवसीय सामना सध्या ग्रेट बॅरियर रीफ एरिना येथे सुरु असून या सामन्यात ऑस्ट्रेलियाच्या सलामीवीर जोडीने ऐतिहासिक कामगिरी केली. सलामी फलंदाज ट्रॅव्हिस हेड आणि मिचेल मार्श यांनी विक्रमी भागीदारी रचत दक्षिण आफ्रिकेविरुद्ध एकदिवसीय क्रिकेटमधील सर्वात मोठी सलामीची भागीदारी करण्याचा विक्रम आपल्या नावे केला. या भागीदारीमुळे ऑस्ट्रेलियाने या सामन्यावर पूर्णपणे वर्चस्व निर्माण केले.
दरम्यान, या सामन्यात मिचेल मार्श आणि ट्रॅव्हिस हेड यांनी पहिल्या विकेटसाठी तब्बल 250 धावांची भागीदारी केली. ही भागीदारी दक्षिण आफ्रिकेविरुद्ध (South Africa) एकदिवसीय क्रिकेटमध्ये झालेली सर्वात मोठी सलामीची भागीदारी आहे. याआधी हा विक्रम इंग्लंडच्या विक्रम सोलंकी आणि मार्कस ट्रेस्कोथिक यांच्या नावावर होता. 2003 मध्ये द ओव्हल मैदानावर या दोघांनी दक्षिण आफ्रिकेविरुद्ध 200 धावांची सलामीची भागीदारी केली होती. या विक्रमापूर्वी, 2001 मध्ये भारताचे महान फलंदाज सौरव गांगुली आणि सचिन तेंडुलकर यांनी जोहान्सबर्ग येथे 193 धावांची भागीदारी केली होती. त्यांचाही विक्रम या ऑस्ट्रेलियन जोडीने मोडीत काढला.
250 - ट्रॅव्हिस हेड आणि मिचेल मार्श (ऑस्ट्रेलिया), 2022*
200 - विक्रम सोलंकी आणि मार्कस ट्रेस्कोथिक (इंग्लंड), 2003
193 - सौरव गांगुली आणि सचिन तेंडुलकर (भारत), 2001
193 - शिवनारायण चंद्रपॉल आणि ख्रिस गेल (वेस्ट इंडिज), 2004
तसेच, या विक्रमासोबतच हेड आणि मार्श यांनी आणखी एक मोठा पराक्रम केला. एकदिवसीय क्रिकेटच्या इतिहासात पाचव्यांदा असे घडले की, ऑस्ट्रेलियाच्या (Australia) सलामीच्या फलंदाजांनी 250 किंवा त्याहून अधिक धावांची भागीदारी केली. ऑस्ट्रेलियासाठी एकदिवसीय क्रिकेटमधील सर्वात मोठी सलामीची भागीदारी 284 धावांची आहे, जी 2017 मध्ये ट्रॅव्हिस हेड आणि डेव्हिड वॉर्नर यांनी पाकिस्तानविरुद्ध केली होती. त्यानंतर 2022 मध्ये इंग्लंडविरुद्ध याच जोडीने 269 धावांची भागीदारी केली होती. अशाप्रकारे, हेड आणि मार्श यांनी ऑस्ट्रेलियाच्या क्रिकेटमधील अत्यंत प्रतिष्ठित यादीत आपले नाव समाविष्ट केले आहे.
284 - ट्रॅव्हिस हेड आणि डेव्हिड वॉर्नर (पाकिस्तानविरुद्ध, 2017)
269 - ट्रॅव्हिस हेड आणि डेव्हिड वॉर्नर (इंग्लंडविरुद्ध, 2022)
259 - मिचेल मार्श आणि डेव्हिड वॉर्नर (पाकिस्तानविरुद्ध, 2022)
258* - ॲरॉन फिंच आणि डेव्हिड वॉर्नर (भारताविरुद्ध, 2020)
250 - ट्रॅव्हिस हेड आणि मिचेल मार्श (दक्षिण आफ्रिकेविरुद्ध, 2022)
या सामन्यात ऑस्ट्रेलियाच्या दोन्ही सलामीच्या फलंदाजांनी शतके झळकावली आहेत. एकदिवसीय क्रिकेटमध्ये आठव्यांदा असे घडले आहे की, ऑस्ट्रेलियाच्या दोन्ही सलामीच्या फलंदाजांनी एकाच सामन्यात शतक ठोकले आहे. या सामन्यात ट्रॅव्हिस हेडने 103 चेंडूंमध्ये 17 चौकार आणि 5 षटकारांच्या मदतीने 142 धावांची तुफान खेळी केली. तर, कर्णधार मिचेल मार्शने 100 धावांचे योगदान दिले. त्याने आपल्या खेळीत 6 चौकार आणि 5 षटकार मारले. या दोन्ही खेळाडूंच्या शतकी खेळीमुळे दक्षिण आफ्रिकेच्या गोलंदाजांवर प्रचंड दबाव निर्माण झाला आणि ऑस्ट्रेलियाने एक मोठी धावसंख्या उभारली. ही ऐतिहासिक कामगिरी केवळ एक विक्रमच नाही, तर ऑस्ट्रेलियाच्या सध्याच्या क्रिकेट संघाची ताकद दर्शवते.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.