भारताचा युवा क्रिकेटपटू तिलक वर्मा आज, म्हणजेच ८ नोव्हेंबर रोजी त्याचा २३ वा वाढदिवस साजरा करत आहे. अल्पावधीतच त्याने भारतीय क्रिकेटमध्ये आपली ओळख निर्माण केली आहे. मैदानावर त्याची आत्मविश्वासपूर्ण फलंदाजी, तुफानी षटकार आणि चौकारांमुळे तो क्रिकेटप्रेमींच्या हृदयात घर करून बसला आहे. २०२५ च्या आशिया कपमध्ये भारताने विजेतेपद पटकावले, त्यात तिलक वर्माने महत्त्वपूर्ण भूमिका बजावली होती. या खास दिवशी चाहत्यांमध्ये त्याच्या खेळासोबतच त्याच्या संपत्तीबद्दलही चर्चा रंगली आहे.

बीसीसीआयकडून मिळणारा पगार

तिलक वर्मा हे सध्या बीसीसीआयच्या केंद्रीय करारातील ग्रेड-सी श्रेणीत येतात. या श्रेणीनुसार त्यांना बोर्डाकडून वार्षिक ₹१ कोटी रुपये पगार मिळतो. त्याशिवाय, एका एकदिवसीय सामन्यासाठी ₹६ लाख आणि प्रत्येक टी२० सामन्यासाठी ₹३ लाख मिळतात. भारतीय संघाचा नियमित भाग म्हणून तो अनेक मालिकांमध्ये खेळतो, त्यामुळे त्याच्या बीसीसीआयकडून मिळणाऱ्या पगारातूनही चांगले उत्पन्न होते.

आयपीएलमधील कमाई

आयपीएलमध्ये तिलक वर्मा हा मुंबई इंडियन्स संघाचा एक महत्त्वाचा सदस्य आहे. आयपीएल २०२५ च्या मेगा लिलावापूर्वी मुंबईने त्याला तब्बल ₹८ कोटी रुपयांना कायम ठेवले. याआधी २०२२ मध्ये मुंबईने त्याला ₹१.७ कोटींना विकत घेतले होते. तिलक आता मुंबईच्या कोअर टीमचा भाग बनला आहे आणि दरवर्षी आयपीएलमधून त्याला मोठा आर्थिक फायदा होत आहे.

जाहिराती आणि ब्रँड प्रमोशनमधून मिळणारे उत्पन्न

तिलक वर्मा आता जाहिरात क्षेत्रातही सक्रिय आहे. तो बूस्ट, एसएस आणि ईबाइकगो यांसारख्या नामांकित ब्रँड्ससाठी प्रमोशन करतो. या जाहिरातींमधून त्याला लाखो रुपयांचे उत्पन्न मिळते. क्रिकेटमधील त्याच्या वाढत्या लोकप्रियतेमुळे त्याचे ब्रँड व्हॅल्यू सतत वाढत आहे आणि भविष्यात आणखी मोठे करार त्याच्याकडे येण्याची शक्यता आहे.

तिलक वर्मा यांची एकूण संपत्ती

अधिकृत आकडेवारी उपलब्ध नसली तरी, काही माध्यमांच्या अहवालांनुसार फेब्रुवारी २०२५ पर्यंत तिलक वर्माची अंदाजे नेट वर्थ ₹५ कोटी होती. मात्र, आयपीएल २०२५ मध्ये मुंबई इंडियन्सने त्याला ₹८ कोटी रुपयांना कायम ठेवल्याने त्याची एकूण संपत्ती लक्षणीय वाढली आहे. तरुण वयातच तिलक वर्माने आर्थिकदृष्ट्या मजबूत पायाभरणी केली असून, भविष्यात तो भारतीय क्रिकेटमधील सर्वात श्रीमंत तरुण खेळाडूंमध्ये गणला जाऊ शकतो.