एकतर्फी प्रेमातून युवतींवर हल्ला होणे. या घटना देशात वारंवार होताना दिसत आहेत. अशीच एक घटना जून 2021 मध्ये तामिळनाडूतील त्रिचीजवळील अंतिकुलम घडली होती. एका 22 वर्षीय तरुणाने एकतर्फी प्रेमातून 16 वर्षीय विद्यार्थिनीला भोकसलं होतं. यानंतर आरोपीनं तब्बल 14 वेळा वार केले होते. या घटनेत मृत विद्यार्थिनी ही इयत्ता अकरावीच्या वर्गात शिकत होती. घटनेच्या दिवशी परीक्षा संपल्यानंतर ती आपल्या नातेवाईकाच्या घरी जात होती. (Tamil Nadu, out of one-sided love, a 21-year-old student was stabbed )

दरम्यान, अंतिकुलम रेल्वे पूलाजवळून जात असताना आरोपी केशवन याने तिला आडवलं आणि प्रेमाची मागणी केली. पण पीडितेनं आरोपीच्या प्रेमाला नकार दिला. यावेळी संतापलेल्या आरोपीनं पीडितेला धारदार चाकुने 14 वेळा भोकसलं आणि घटनास्थळावरून पळ काढला होता. या आरोपीचा मृतदेह काल रात्री उशिरा मानापराई रेल्वे रुळाजवळ आढळला आहे.

विशेष म्हणजे संबंधित मुलीचं अपहरण केल्याप्रकरणी आरोपीवर आधीच पोक्सोअंतर्गत गुन्हा दाखल झाला होता. तुरुंगातून सुटल्यानंतर त्यानं पुन्हा पीडित मुलीचा पाठलाग सुरू केला आणि प्रेमाची मागणी केली. पण तिने नकार देताच आरोपीनं तिची हत्या केली. या घटनेची माहिती मिळाल्यानंतर पोलिसांनी गुन्हा दाखल करत आरोपीचा शोध सुरू केला. पण त्याचा काही थांगपत्ता लागत नव्हता.

दरम्यान, मंगळवारी रात्री उशिरा मानापराई रेल्वे रुळाजवळ एका तरुणाचा मृतदेह आढळल्याची माहिती पोलिसांना मिळाली. पोलिसांनी घटनास्थळी जाऊन तपास केला असता संबंधित मृतदेह आरोपी केशवननचा असल्याचं स्पष्ट झालं आहे. मृताच्या वडिलांनी याबाबत पुष्टी केली आहे. या घटनेचा पुढील तपास पोलीस करत आहेत.