Supreme Court: देशाचे नवे सरन्यायाधीश होणार असलेल्या डीवाय चंद्रचूड यांच्याविरोधात दाखल करण्यात आलेला अर्ज सर्वोच्च न्यायालयाने फेटाळून लावला आहे. या अर्जात न्यायमूर्ती डीवाय चंद्रचूड यांना सरन्यायाधीशपदाची शपथ घेण्यापासून रोखण्याची मागणी करण्यात आली होती.

दरम्यान, या अर्जावर सुनावणी करताना सर्वोच्च न्यायालयाने (Supreme Court) सांगितले की, 'या अर्जात सुनावणी घेण्यासारखे काहीच नाही. न्यायमूर्ती डीवाय चंद्रचूड हे 9 नोव्हेंबर रोजी सरन्यायाधीशपदाची शपथ घेणार आहेत. न्यायमूर्ती यू यू लळित यांच्या जागी त्यांची देशाचे नवे सरन्यायाधीश म्हणून निवड झाली आहे.'

तसेच, एका वकिलाच्या वतीने न्यायमूर्ती चंद्रचूड यांच्या विरोधात हा अर्ज दाखल करण्यात आला होता, जो न्यायमूर्ती रवींद्र भट आणि बेला एम. त्रिवेदी यांच्या खंडपीठासमोर सादर करण्यात आला होता. न्यायमूर्ती चंद्रचूड हे देशाचे 50 वे सरन्यायाधीश म्हणून शपथ घेणार आहेत.