Sidhu Moose Wala Case: पंजाबी गायक सिद्धू मुसेवाला यांच्या हत्येची सीबीआय चौकशी करण्याची मागणी फेटाळत सर्वोच्च न्यायालयाने या प्रकरणाचे राजकारण करु नये, असा सल्ला दिला आहे. गँगस्टर लॉरेन्स विश्नोईच्या वडिलांनी दाखल केलेल्या दोन याचिकांवर सुनावणी करताना सर्वोच्च न्यायालयाने हे निरीक्षण नोंदवले.

दरम्यान, न्यायमूर्ती अजय रस्तोगी आणि अभय ओका यांच्या खंडपीठाने सांगितले की, 'आमच्यासाठी सर्व पक्ष समान आहेत. अशा प्रकरणांमध्ये राजकीय पक्षांना स्थान नाही, असे आमचे मत आहे. कोण कोणत्या पक्षाचा आहे याने काही फरक पडत नाही. या न्यायालयाचे (Court) दरवाजे सर्वांसाठी खुले आहेत, मात्र या प्रकरणाला राजकीय रंग देऊ नका.'

दुसरीकडे, मे महिन्याच्या शेवटच्या आठवड्यात पंजाबमधील (Punjab) मानसा जिल्ह्यातील जवाहरके गावात सिद्धू मुसेवाला यांच्यावर हल्ला झाला होता. काही हल्लेखोरांना त्यांची हत्या केली. या प्रकरणात पोलिसांनी गँगस्टर लॉरेन्स बिश्नोई याला आरोपी बनवले असून तो सध्या कोठडीत आहे. सिद्धू मुसेवाला काँग्रेसचे (Congress) नेते होते. ज्यांची सुरक्षा इतर 400 लोकांसह काढून घेण्यात आली होती. या प्रकरणाची सीबीआय चौकशी करण्याची मागणी करणारा अर्जही भाजप नेते जगजित सिंग यांच्या वतीने दाखल करण्यात आला होता. याशिवाय बिश्नोईचे वडील लविंदर सिंग यांनीही अर्ज केला होता.

तसेच, या अर्जावर सुनावणी करताना खंडपीठाने सांगितले की, "पंजाब पोलिस या प्रकरणाची चौकशी करत आहेत. त्यावर तुम्ही राजकारण का करत आहात.' त्यावर पंजाब सरकारची बाजू मांडणारे ज्येष्ठ वकील अभिषेक मनू सिंघवी म्हणाले की, ''लॉरेन्स बिश्नोईवर खून आणि खंडणीचे 57 गुन्हे दाखल आहेत. यानंतरही पंजाब पोलिसांना मिळालेल्या अटक वॉरंटला त्याच्या वडिलांनी आव्हान दिले आहे.''

सिंघवी पुढे म्हणाले, 'आमच्याकडे माहिती आहे की तो आंतरराष्ट्रीय शूटरच्या संपर्कात होता. ज्यांच्या माध्यमातून मुसेवालाची हत्या करण्यात आली. त्यामुळे या प्रकरणाचा तपास करण्यासाठी आम्ही त्याला कोठडीत ठेवू इच्छितो. आता अटक वॉरंटवर त्याला ताब्यात घेता येणार नाही.'