Shubman Gill Record: ओव्हल येथे खेळल्या जात असलेल्या पाचव्या कसोटी सामन्यात भारतीय संघाचा कर्णधार शुभमन गिलने इतिहास रचला. आता तो कसोटी मालिकेत भारतासाठी सर्वाधिक धावा करणारा भारतीय कर्णधार बनला. या बाबतीत त्याने सुनील गावस्कर यांना मागे सोडले. हा विक्रम मोडण्यासाठी गिलला फक्त 11 धावा करायच्या होत्या. या सामन्यात त्याने 11 धावा करताच एक मोठा विक्रम आपल्या नावावर केला. एवढेच नाहीतर त्याने पहिली रन काढताच 59 वर्ष जुना विक्रमही मोडीत काढला.

गिलने गॅरी सोबर्सचा विक्रम मोडला

दरम्यान, भारतीय संघाने नाणेफेक हरल्यानंतर पहिल्यांदा फलंदाजी स्वीकारली. भारताने 38 धावांवर केएल राहुलच्या (KL Rahul) रुपाने दुसरी विकेट गमावल्यानंतर कर्णधार शुभमन गिल फलंदाजीसाठी मैदानात आला. गिलने आपल्या डावातील सहाव्या चेंडूवर खाते उघडताच, या कसोटी मालिकेत त्याच्या एकूण धावा 723 झाल्या.

यासोबतच तो सेना (SENA - South Africa, England, New Zealand, Australia) देशांमध्ये कर्णधार म्हणून एका कसोटी मालिकेत सर्वाधिक धावा करणारा खेळाडू बनला. यापूर्वी, हा विक्रम वेस्ट इंडिजचे महान खेळाडू गॅरी सोबर्स यांच्या नावावर होता. सोबर्स यांनी 1966 मध्ये इंग्लंड दौऱ्यावर कर्णधार म्हणून 722 धावा केल्या होत्या. गिलने सोबर्स यांचा 59 वर्ष जुना विक्रम मोडीत काढत नवा इतिहास रचला.

सुनील गावस्कर यांचाही विक्रम ध्वस्त

ओव्हल कसोटी सामन्यात शुभमन गिलने आणखी एक मोठी कामगिरी केली. तो आता भारतासाठी एका कसोटी मालिकेत कर्णधार म्हणून सर्वाधिक धावा करणारा खेळाडू बनला. गिलने याबाबतीत भारताचे महान फलंदाज सुनील गावस्कर (Sunil Gavaskar) यांचा विक्रम मोडीत काढला. गावस्कर यांनी 1978-79 मध्ये वेस्ट इंडिजविरुद्धच्या कसोटी मालिकेत कर्णधार म्हणून एकूण 732 धावा केल्या होत्या. आता या यादीत शुभमन गिल अव्वल स्थानी पोहोचला.

गिलच्या या अप्रतिम कामगिरीमुळे भारतीय क्रिकेटमध्ये एक नवा अध्याय लिहिला गेला असून, त्याच्या नेतृत्वाखाली भविष्यातील कामगिरीकडे सर्वांचे लक्ष लागले आहे.