Scooter Elephant Accident Uttarakhand: रस्त्यावरुन प्रवास करताना अचानक समोर हत्ती येणे ही अत्यंत भीतीदायक आणि चकित करणारी गोष्ट असते. मात्र, उत्तराखंडमधील खाटीमा रोडवर नुकतीच एक अशी अविश्वसनीय आणि धक्कादायक घटना घडली, ज्यावर विश्वास ठेवणे कठीण झाले. येथे एका महिला शिक्षिकेने आपल्या ॲक्टिव्हा स्कूटरवरुन थेट एका महाकाय हत्तीलाच जोरदार धडक दिली.

ही धडक इतकी भीषण होती की, थेट हत्तीचा सुळा (दात) तुटून मोठ्या आवाजासह रस्त्यावर पडला. या विचित्र आणि गंभीर अपघातानंतर घाबरलेला आणि जखमी झालेला हत्ती कसातरी उठून उभा राहिला आणि त्याने जंगलाच्या दिशेने पळ काढला. हा संपूर्ण थरार कॅमेऱ्यात कैद झाला असून याचा व्हिडिओ सध्या सोशल मीडियावर (Social Media) वेगाने व्हायरल होत आहे. 'X' वर @RakeshKishore_l नावाच्या हँडलवरुन हा व्हिडिओ शेअर करण्यात आला.

मिळालेल्या माहितीनुसार, अपघात इतका जबरदस्त होता की शिक्षिकेच्या स्कूटरचा अक्षरशः चक्काचूर झाला. धडक लागताच हत्ती रस्त्यावर कोसळला आणि त्याचा सुळा तुटल्याने उपस्थित नागरिक आणि प्रत्यक्षदर्शी स्तब्ध झाले. व्हिडिओमध्ये दिसते की, जखमी झालेला हत्ती आधी उठण्याचा प्रयत्न करतो आणि काही क्षणांनंतर यशस्वीरित्या उभा राहून वेदनेने आणि भीतीने जंगलाकडे पळत सुटतो. प्राण्याला अशा अवस्थेत धावताना पाहून अपघाताच्या तीव्रतेचा अंदाज येतो. रस्त्यावर पडलेला हत्तीचा सुळा या अपघाताची भीषणता स्पष्टपणे सांगत आहे. खाटीमा रोडवर घडलेली ही घटना अत्यंत दुर्मिळ आणि तितकीच चिंताजनक मानली जात आहे.

या धक्कादायक अपघाताचा व्हिडिओ समोर आल्यानंतर नेटकऱ्यांनी आणि सोशल मीडिया युझर्सनी यावर तीव्र आणि संमिश्र प्रतिक्रिया देण्यास सुरुवात केली. एका युझरने आश्चर्य व्यक्त करत लिहिले की, 'जरा विचार करा, ती महिला नेमकी कोणत्या वेगाने गाडी चालवत होती? आपण माणसे वेगमर्यादेचा कधीच विचार करत नाही? वन्यजीवांना शांततेने जगू देण्याऐवजी आपण त्यांना आपल्या वाहनांखाली का चिरडत आहोत?' तर दुसऱ्या एका युझरने या घटनेवर अविश्वास दाखवत म्हटले की, 'ही गोष्ट खरोखर मानण्यासारखी आहे का? स्कूटरच्या धडकेमुळे हत्तीचा सुळा कसा तुटू शकतो? आणि एवढ्या मोठ्या प्राण्याला धडकून ती महिला कशी जिवंत राहिली?'

तसेच, तिसऱ्या एका युझरने भौगोलिक माहिती देत लिहिले की, 'हा खटीमा रस्ता उत्तराखंडमध्येच आहे, सुदैवाने महिला आणि हत्ती दोघेही सुरक्षित आहेत.' तर अन्य एका व्यक्तीने संताप व्यक्त करत 'आता रस्त्यांवर हत्तीही सुरक्षित राहिलेले नाहीत,' अशी चपराक लगावली. सुदैवाने या अपघातात कोणाचाही जीव गेला नसला, तरी वन्यजीव क्षेत्रातील वाहनांच्या वेगाचा आणि प्राण्यांच्या सुरक्षिततेचा गंभीर प्रश्न या निमित्ताने पुन्हा एकदा ऐरणीवर आला.