Rohit Sharma Viral Gym Video

मुंबईचा राजा रोहित शर्मा पुन्हा एकदा चर्चेत आला आहे. २०२७ च्या विश्वचषकासाठी त्याची दमदार तयारी सध्या चर्चेचा विषय ठरत आहे. सोशल मीडियावर रोहितचा जीममध्ये घाम गाळतानाचा व्हिडिओ प्रचंड व्हायरल होत आहे. ३८ वर्षीय अनुभवी फलंदाजाचा हा फिटनेस सेशन पाहून चाहत्यांमध्ये उत्सुकता वाढली आहे. रोहितच्या मेहनतीतून स्पष्ट दिसते की तो आगामी विश्वचषकासाठी स्वतःला परिपूर्ण तंदुरुस्त करण्याच्या तयारीत आहे.

अलिकडच्या काळात रोहितने लक्षणीय वजन कमी केले असून त्याचा प्रभाव त्याच्या फिटनेसवर दिसून येतो. कसोटी आणि टी-२० फॉरमॅटमधून निवृत्ती घेतल्यानंतर आता त्याचे संपूर्ण लक्ष एकदिवसीय क्रिकेटकडे आहे. पुढील महिन्यात होणाऱ्या ऑस्ट्रेलिया दौऱ्यात तो पुन्हा भारतीय संघाचे नेतृत्व करताना दिसणार आहे. या मालिकेसाठी त्याने बेंगळुरूमधील बीसीसीआय सेंटर ऑफ एक्सलन्समध्ये विशेष प्रशिक्षण घेतले आहे.

बीसीसीआयने त्यांच्या अधिकृत ‘एक्स’ (माजी ट्विटर) हँडलवर २१ सप्टेंबर रोजी एक व्हिडिओ शेअर केला. त्यात रोहित शर्मा आणि केएल राहुल दोघेही जिममध्ये सराव करताना आणि नेट्समध्ये फलंदाजी करताना दिसतात.

बीसीसीआयने कॅप्शनमध्ये लिहिले की,"आगामी स्पर्धांसाठी तयारी करण्यासाठी, रोहित शर्मा आणि केएल राहुल यांनी बीसीसीआय सेंटर ऑफ एक्सलन्स येथे सराव केला."

२०२३ च्या विश्वचषकात अंतिम सामन्यात भारताला ऑस्ट्रेलियाकडून पराभव पत्करावा लागला होता. ती निराशा अजूनही चाहत्यांच्या मनात ताजी आहे. त्यामुळेच २०२७ च्या दक्षिण आफ्रिकेत होणाऱ्या विश्वचषकात भारताला विजेतेपद मिळवून देण्याचा निर्धार रोहितने केला आहे. त्याने अनेक मुलाखतींमध्ये याबाबत स्पष्टपणे सांगितले आहे की, तो शेवटपर्यंत लढेल आणि टीम इंडियाला पुन्हा गौरव मिळवून देईल.

आता चाहत्यांची नजर त्याच्या या तयारीकडे आहे. रोहितचा जिम वर्कआउट आणि नेट सराव पाहून क्रिकेटप्रेमींची खात्री पटली आहे की "हिटमॅन" २०२७ मध्येही आपल्या जोरदार कामगिरीने विश्वचषक गाजवायला सज्ज आहे.