Rohit Sharma 11000 ODI runs

२०२५ च्या चॅम्पियन्स ट्रॉफीमध्ये भारत आणि बांगलादेश यांच्यातील सामना दुबई आंतरराष्ट्रीय क्रिकेट स्टेडियमवर खेळला जात आहे. या सामन्यात भारतीय कर्णधार रोहित शर्मानं इतिहास रचला. त्यानं क्रिकेटचा देव सचिन तेंडूलकरला मागे टाकत मोठा विक्रम केला आहे.

रोहित शर्मा ११००० एकदिवसीय धावा पूर्ण करणारा दुसरा सर्वात जलद खेळाडू ठरला. रोहितने हा टप्पा गाठण्यासाठी २६१ डाव ​​घेतले. या यादित विराट कोहली पहिल्या क्रमांकावर आहे. त्याने फक्त २२२ डावांमध्ये ११००० एकदिवसीय धावा पूर्ण केल्या आहेत.

रोहितने भारतीय दिग्गज सचिन तेंडुलकरला मागं टाकलं आहे. सचिनने हा पराक्रम करण्यासाठी २७६ डाव खेळले होते. रोहित आता एकदिवसीय क्रिकेटमध्ये ११००० धावा करणारा १० वा खेळाडू आहे. विराट कोहली, सचिन तेंडुलकर आणि सौरव गांगुली यांच्यानंतर ११००० धावा करणारा रोहित चौथा भारतीय खेळाडू ठरला आहे.

एकदिवसीय क्रिकेटमध्ये सर्वाधिक धावा करणाऱ्या खेळाडूंच्या यादीत रोहित आता १० व्या स्थानावर आहे. रोहित नवव्या स्थानावर असलेल्या सौरव गांगुलीपेक्षा फक्त ३६३ धावांनी मागे आहे.

ज्याच्या नावावर ११,३६३ धावा आहेत. या यादीत तिसऱ्या स्थानावर असलेला विराट कोहली हा एकमेव सक्रिय क्रिकेटपटू आहे, तर भारतीय दिग्गज सचिन तेंडुलकर १८४२६ धावांसह या यादीत अव्वल स्थानावर आहे.

भारताने चालू आयसीसी चॅम्पियन्स ट्रॉफी २०२५ जिंकली तर २००७ च्या टी२० विश्वचषक, २०१३ च्या आयसीसी चॅम्पियन्स ट्रॉफी आणि २०२४ च्या आयसीसी टी२० विश्वचषक विजेत्या संघाचा भाग असलेला रोहित शर्मा विराट कोहलीसह चार आयसीसी स्पर्धा जिंकणारा दुसरा भारतीय खेळाडू बनेल.

तो कर्णधार म्हणून दोन आयसीसी स्पर्धा जिंकणारा एमएस धोनीनंतर दुसरा भारतीय खेळाडू बनेल.