Election Commission On Rahul Gandhi: लोकसभा विरोधी पक्षनेते राहुल गांधी हरियाणा विधानसभा निवडणुकीवरुन निवडणूक आयोगावर सातत्याने टीका करत आहेत. निवडणुकीत 'व्होट चोरी' झाली असून 25 लाखांहून अधिक बनावट मतदार दाखवल्याचा दावा त्यांनी केला. मात्र आता मीडिया रिपोर्ट्सनुसार, निवडणूक आयोगाने राहुल गांधींचे 'एच-फाईल्स' नावाचे हे सर्व आरोप "खोटे आणि बिनबुडाचे'' ठरवून फेटाळून लावले. निवडणूक आयोगाच्या सूत्रांनी दिलेल्या माहितीनुसार, राहुल गांधींनी हरियाणा निवडणुकीत मोठ्या प्रमाणावर हेराफेरी झाल्याचा जो दावा केला त्यासंबंधीचे ठोस पुरावे त्यांनी किंवा काँग्रेस पक्षाने दिले नाहीत.

राहुल गांधींचे तीन मुख्य आरोप

राहुल गांधींनी पत्रकार परिषदेत 'एच-फाईल्स' (Hydrogen Bomb) नावाचे कागदपत्र दाखवून निवडणूक आयोगावर गंभीर आरोप केले. हरियाणात पाच लाखांपेक्षा जास्त बनावट मतदार आहेत. 1,24,177 मतदारांसाठी एकाच व्यक्तीचा फोटो वारंवार वापरला गेला. एकाच मतदारसंघात 10 मतदान केंद्रांवर तब्बल 22 वेगवेगळ्या मतदारांसाठी एका ब्रझीलियन मॉडेलचा फोटो वापरला गेला. मोठ्या इमारतीत राहणाऱ्यांसाठीही घराचा क्रमांक '0' (शून्य) असलेला मतदार नोंदवला गेला, असे आरोप त्यांनी केले.

निवडणूक आयोगाचे स्पष्ट उत्तर

मात्र, राहुल गांधींच्या या आरोपांवर निवडणूक आयोगाने सडेतोड उत्तर दिले. आयोगाने म्हटले की, 'हे आरोप पूर्णपणे खोटे आणि निराधार आहेत. त्यांचे हे आरोप देशाच्या लोकशाही संस्थांना बदनाम करण्याचे षडयंत्र आहे.'

निवडणूक आयोगाने सर्व राजकीय पक्षांना मतदार यादीची दुरुस्ती करताना आपल्या बूथ-स्तरीय एजंट्सद्वारे आक्षेप नोंदवण्याची संधी दिली होती. पण काँग्रेस पक्षाने त्यावेळी कोणतेही आक्षेप नोंदवले नाहीत. ज्या घरांना अधिकृतरित्या नगरपालिका किंवा ग्रामपंचायतीचा क्रमांक दिलेला नसतो, त्या घरांना '0' (शून्य) क्रमांक देण्याची सामान्य सरकारी पद्धत आहे. हा काही घोटाळा नाही, असेही आयोगाने पुढे म्हटले.

आयोगाने राहुल गांधींना त्यांच्या दाव्यांना सिद्ध करण्यासाठी प्रतिज्ञापत्र (Affidavit) दाखल करण्याची मागणीही केली, परंतु राहुल गांधींनी अद्याप ते दाखल केलेले नाही. आयोगाने स्पष्ट केले की, त्यांच्या सार्वजनिक भाषणांना केवळ त्यांचे 'शब्द' मानले जाईल.

राजकारण तापले

गेल्या काही दिवसांपासून या मुद्द्यावरुन देशात मोठी राजकीय वादावादी सुरु आहे. भाजपने राहुल गांधींवर जोरदार टीका करत त्यांना 'बाहेरील शक्तींच्या' हातातील बाहुले म्हटले. तर काँग्रेसने आरोप केला की, 'निवडणूक आयोग सत्ताधारी भाजपला निवडणुकीत मदत करतो.' मात्र आता, निवडणूक आयोगाने पुरावे मागितल्यामुळे राहुल गांधी त्यांच्या 'एच-फाईल्स'मधील दाव्यांना सिद्ध करण्यासाठी काय पाऊल उचलतात हे पाहणे औत्सुक्याचे असेल.