Purvanchal Expressway Road Accident: अयोध्या येथील पूर्वांचल एक्सप्रेस-वेवर आज (7 ऑक्टोबर) सकाळी एक अत्यंत भीषण अपघात झाला, ज्यामध्ये तीन खेळाडूंचा जागीच मृत्यू झाला तर तीन जण गंभीर जखमी झाले. लखनौहून देवरियाच्या दिशेने जाणारी अर्टिगा कार सुमारे 100 किलोमीटर प्रति तासाच्या वेगाने धावत होती. सकाळी साडेपाच वाजण्याच्या सुमारास या भरधाव कारने ट्रकला पाठीमागून जोरदार धडक दिली. या दुर्घटनेत कारचा चुराडा झाला. कारमध्ये प्रवास करणारे सर्व सहा जण थकल्यामुळे गाढ झोपेत होते, अशी माहिती जखमी खेळाडू जयंतो शर्मा याने पोलिसांना दिली. हे सर्वजण लखनौ येथे टेनिसचा सामना खेळून आपल्या गावी परतत होते.

या भीषण अपघातात (Accident) 22 वर्षीय नित्या प्रजापति, 24 वर्षीय अनिकेत आणि 20 वर्षीय इरफान अन्सारी यांचा जागीच मृत्यू झाला. घटनेची माहिती मिळताच उत्तर प्रदेश एक्सप्रेसवे औद्योगिक विकास प्राधिकरणाचे सुरक्षा कर्मचारी आणि स्थानिक पोलीस तात्काळ घटनास्थळी दाखल झाले. त्यांनी तातडीने बचाव कार्य राबवून कारमध्ये अडकलेल्या प्रवाशांना बाहेर काढले आणि अयोध्या जिल्ह्यातील कुमारगंज येथील सौ शैय्या संयुक्त रुग्णालयात हलवले.

प्राथमिक उपचारानंतर प्रकृती गंभीर असलेल्या 23 वर्षीय आनंद यादव, 30 वर्षीय जयंतो शर्मा आणि 22 वर्षीय राजू यांना पुढील उपचारासाठी दर्शननगर येथील मेडिकल कॉलेजमध्ये रेफर करण्यात आले. जिथे त्यांच्यावर सध्या उपचार सुरु आहेत. या दुर्घटनेनंतर पोलिसांनी अज्ञात ट्रकचा शोध सुरु केला असून, अपघात नेमका कसा घडला याच्या तपासाची चक्रे वेगाने फिरवली आहेत. या दुर्घटनेमुळे खेळाडूंच्या कुटुंबावर आणि परिसरात शोककळा पसरली असून, महामार्गावरील वेगाच्या नियमांकडे पुन्हा एकदा गांभीर्याने पाहण्याची गरज निर्माण झाली आहे.