Israeli Embassy: इस्रायल-हमास युद्धाचा आज 81 वा दिवस आहे. जगभरातील अनेक देश आणि नेते इस्रायलवर युद्धबंदीसाठी दबाव आणत आहेत, मात्र इस्रायल गाझा पट्टीवर दिवसेंदिवस हल्ले वाढवत आहे. यातच राजधानी दिल्लीमधून एक मोठी बातमी समोर आली आहे. राजधानी दिल्लीतील इस्रायली दूतावासाच्या मागे असलेल्या मोकळ्या जागेत स्फोट झाल्याची बातमी समोर आली आहे. आतापर्यंत मिळालेल्या माहितीनुसार, पोलिसांना एक फोन आला होता, ज्यामध्ये एका व्यक्तीने स्फोट झाल्याविषयी सांगितले होते. प्रकरणाचे गांभीर्य पाहून पोलिसांनी तात्काळ घटनास्थळ गाठून सर्च ऑपरेशन सुरु केले. विशेष सेलची टीमही घटनास्थळी पाठवण्यात येत आहे.

अजून सुगावा लागला नाही

मिळालेल्या माहितीनुसार, अग्निशमन दलाला 5.45 वाजता स्फोट झाल्याची माहिती मिळाली, त्यानंतर अग्निशमन दल आणि पोलिस अधिकारी घटनास्थळी पोहोचले. अग्निशमन अधिकाऱ्याच्या म्हणण्यानुसार, स्फोटासारख्या घटनेची घटनास्थळी पुष्टी झालेली नाही आणि स्फोटाचे कोणतेही पुरावे मिळालेले नाहीत. संपूर्ण परिसराची झडती घेण्यात आली आहे. पोलीस या संपूर्ण परिसराची चौकशी करत आहेत. वरिष्ठ पोलीस अधिकारी सध्या घटनास्थळी हजर आहेत.

लोकांनी मोठा आवाज ऐकला

दिल्ली अग्निशमन सेवा संचालक अतुल गर्ग यांनी सांगितले की, दिल्ली अग्निशमन सेवेला आज संध्याकाळी चाणक्यपुरी भागातील इस्रायल दूतावासाजवळ स्फोट झाल्याचा कॉल आला होता. घटनास्थळी अद्याप काहीही आढळून आलेले नाही. मात्र, समोर काश्मीर भवनही आहे. त्यांच्या एका कर्मचाऱ्याने सांगितले की, लोकांनी मोठा आवाज ऐकल्याचे सांगितले. हा आवाज कशाचा होता हे तपासानंतरच कळेल. घटनास्थळाची चौकशी सुरु आहे.

यापूर्वीही स्फोट झाला आहे

याआधीही दिल्लीतील इस्रायली दूतावासाला लक्ष्य करण्यात आले आहे. 29 जानेवारी 2021 रोजी दिल्लीतील इस्रायली दूतावासाबाहेर IED स्फोट झाला होता. पोलिसांना घटनास्थळावरून काही बॉल बेअरिंग्सही सापडले ज्याचा वापर बॉम्ब बनवण्यासाठी केला जात होता. यानंतरही इस्रायली दूतावासाला अलर्ट जारी करण्यात आला आहे. इस्रायल आणि हमास यांच्यात सुरु असलेल्या युद्धादरम्यान कोणताही अनुचित प्रकार घडू नये यासाठी कडक बंदोबस्तही ठेवण्यात आला आहे.