नवी दिल्ली : पंतप्रधान नरेंद्र मोदी यांनी आज प्रगती मैदान इंटिग्रेटेड ट्रान्झिट कॉरिडॉर प्रकल्पाच्या मुख्य बोगद्याचे आणि पाच अंडरपासचे रविवारी उद्घाटन केले. मात्र, यावेळी एक मनोरंजक दृश्य समोर आले. जेव्हा रस्त्याच्या बाजूला पडलेला कचरा पीएम मोदींनी स्वतः उचलला, रिकामी पाण्याची बाटली उचलण्यास सुरुवात केली तेव्हा सगळे अवाक झाले. त्यांचा व्हिडिओही सध्या सोशल मिडियावर व्हायरल होत आहे. व्हिडिओमध्ये पीएम मोदी हाताने काही कागदाचे तुकडे आणि जवळ पडलेली पाण्याची रिकामी बाटली उचलून फेरफटका मारताना दिसत आहेत. (PM Modi is seen picking up used bottles while inspecting the tunnel in video)

प्रगती मैदान एकात्मिक ट्रान्झिट कॉरिडॉर प्रकल्प हा प्रगती मैदान पुनर्विकास प्रकल्पाचा एक महत्त्वाचा भाग आहे. संपूर्णपणे केंद्र सरकारच्या निधीतून उभारलेल्या या प्रकल्पासाठी 920 कोटी रुपये खर्च आला आहे. प्रगती मैदानावरील कार्यक्रमांमध्ये अभ्यागत आणि प्रदर्शकांचा सहभाग सुलभ करण्यासाठी प्रगती मैदानावर विकसित होत असलेल्या नवीन जागतिक दर्जाच्या प्रदर्शन आणि अधिवेशन केंद्रात सहज प्रवेश प्रदान करणे हे या प्रकल्पाचे उद्दिष्ट आहे.

या प्रसंगी पंतप्रधान मोदींनी प्रगती मैदान इंटिग्रेटेड ट्रान्झिट कॉरिडॉर प्रकल्पाच्या मुख्य बोगद्यासह पाच अंडरपासचे अनावरण केले. प्रगती मैदान इंटिग्रेटेड ट्रान्झिट कॉरिडॉर प्रकल्पाचा मुख्य बोगदा रिंग रोडला पुराण किला रोड मार्गे इंडिया गेटला जोडतो. हा सहा लेनचा विभाजित बोगदा प्रगती मैदानाच्या प्रशस्त तळघर पार्किंगमध्ये प्रवेशासह अनेक उद्देशांसाठी काम करतो. या बोगद्याचा एक अनोखा घटक म्हणजे मुख्य बोगद्याच्या रस्त्याखाली दोन क्रॉस बोगदे बांधण्यात आले आहेत जेणेकरून वाहनतळाच्या दोन्ही बाजूंनी वाहतूक सुरळीत होईल.

हा बोगदा अग्निशामक व्यवस्थापन, स्वयंचलित ड्रेनेज, डिजिटली नियंत्रित सीसीटीव्ही आणि सार्वजनिक घोषणा प्रणालीसह नवीनतम जागतिक मानक सुविधांनी सुसज्ज आहे. बहुप्रतिक्षित बोगदा भैरों मार्गासाठी पर्यायी मार्ग म्हणून काम करेल आणि भैरो मार्गावरील वाहतुकीचा भार अर्ध्याहून अधिक कमी करेल. या बोगद्याबरोबरच मथुरा रोडवर चार, भैरों मार्गावर एक आणि रिंगरोडवर एक असे सहा अंडरपास असतील.