National Herald Money Laundering Case: नॅशनल हेराल्ड प्रकरणात मोठी कारवाई करत ईडीच्या अधिकाऱ्यांनी नॅशनल हेराल्डचे कार्यालय सील केले आहे. एएनआय वृत्तसंस्थेनुसार, ईडीच्या अधिकाऱ्यांनी सांगितले की, 'एजन्सीच्या परवानगीशिवाय कार्यालय सुरु करता येणार नाही.' नॅशनल हेराल्ड प्रकरणात ईडीच्या अधिकाऱ्यांनी सोनिया गांधी आणि राहुल गांधी यांची चौकशी केली आहे.

दरम्यान, नॅशनल हेराल्ड मनी लॉन्ड्रिंग प्रकरणी ईडीकडून (ED) कारवाई सुरु आहे. ईडी अधिकाऱ्यांनी नॅशनल हेराल्ड कार्यालयाच्या 14 ठिकाणी छापे टाकले. बुधवारी एजन्सीच्या अधिकाऱ्यांनी नॅशनल हेराल्डचे कार्यालय सील केले. परवानगीशिवाय कार्यालय सुरु करण्यात येऊ नये, असे निर्देशही देण्यात आले आहेत.

काँग्रेस मुख्यालयात सुरक्षा वाढवण्यात आली

मिळालेल्या माहितीनुसार, ईडीच्या नॅशनल हेराल्ड कार्यालयाला सील ठोकण्याच्या कारवाईनंतर खबरदारीचा उपाय म्हणून काँग्रेस मुख्यालयात सुरक्षा वाढवण्यात आली आहे. यासोबतच काँग्रेस (Congress) कार्यालयाबाहेरील रस्ताही बंद करण्यात आला आहे. कार्यालय सील केल्यानंतर काँग्रेस नेते रस्त्यावर उतरुन आंदोलन करु शकतात, अशी भीती पोलिसांना आहे.

दुसरीकडे, काँग्रेसचे ज्येष्ठ नेते जयराम रमेश (Jairam Ramesh) यांनी ट्विट करत म्हटले की, "दिल्ली पोलिसांनी (Delhi Police) एआयसीसी मुख्यालयाकडे जाणारा मार्ग रोखला आहे."