एका व्यक्तीने स्टोरेजसाठी तब्बल 40 हजार रुपयांना एक वस्तू खरेदी केली होती. ज्यामध्ये त्याला 60 कोटी रुपयांची रोकड सापडली. परंतु त्यानंतर या पैशाच्या खऱ्या मालकाला या संपुर्ण घटनेची माहिती मिळाली. त्यानंतर त्या व्यक्तीला ते पैसे मालकाला परत करावे लागले.

स्टोरेज वॉर्स या टीव्ही शोचा होस्ट डॅन डॉटसनने 4 वर्षांपूर्वी सोशल मीडियावर या घटनेचा खुलासा केला आहे. तो म्हणाला की त्याच्या एका क्लायंटने लिलाव करताना काही वस्तू विकत घेतल्या आणि त्यानंतरच ही सगळी माहिती समोर आली आहे. सोशल मीडियावर एक क्लिप पोस्ट करून, डॅनने सांगितले की ज्या व्यक्तीने स्टोरेज कंटेनर विकत घेतला त्याला कंटेनरमध्ये एक बॅग दिसली. त्याने दुसऱ्या व्यक्तीला बॅग उघडण्यासाठी बोलावले. त्याने बॅग उघडली तेव्हा त्यात सुमारे 60 कोटी रुपये होते.

मात्र, त्या पेटीच्या मालकाला काही दिवसांनी आपली चूक लक्षात आली आणि त्यांनी वकिलांना त्या व्यक्तीकडे पाठवले. द ब्लास्ट मॅगझिनशी झालेल्या संभाषणात डॅन म्हणाले - सुरुवातीला वकिलांनी त्या व्यक्तीला सुमारे 4 कोटी रुपयांचे बक्षीस देऊ केले होते. ज्याला त्या व्यक्तीने नकार दिला होता. दुसऱ्यांदा सुमारे 9 कोटी रुपयांची ऑफर त्या व्यक्तीला देण्यात आली.

पुढे डॅन म्हणाला की , "मला वाटत नाही की बॅगमध्ये 60 कोटी रोख ठेवून तुम्ही विसरू शकता. ही रोख रक्कम दुसऱ्याला ठेवण्यासाठी दिली होती असे दिसते. मात्र, केवळ त्यांच्या पैशासाठी एखाद्याला 9 कोटी रुपयांचे बक्षीस देणे ही मोठी गोष्ट आहे. जे सहसा कोणी करू शकत नाही."